Unha ampla maioría decidíu o pasado día 30 que Manuel Baltar sexa o presidente do Partido Popular de Ourense os vindeiros catro anos. Toma este cargo “con ganas” porque, asegura “chegou a hora de Ourense”, e faino cunha executiva ampla, coa maioría dos concellos representados pero sen integrar ao seu oponente nestas eleccións previas “porque vou ser coherente co que dixen dende o principio”.
Por diante queda agora traballo e o primeiro reto do seu mandato: as eleccións municipais que se celebrarán o vindeiro ano. Baltar Blanco é optimista e manifesta que “como sempre foi no Partido Popular” o obxectivo é acadar “as 92 alcaldías”. Recoñece que é unha tarefa difícil pero di “estamos en 62 e eu penso que podemos chegar, co apoio do Goberno autonómico e con esta nova forza que vamos a aportar ao partido, a superar en dez o número de alcaldías que temos neste momento”. Polo pronto, xa reuníu ao Comité de Dirección do partido. Fíxoo no Barco, como prometera hai uns meses, o día 1 de febreiro. Con el dá inicio unha nova andadura no Partido Popular de Ourense.
¿Que valoración fai sobre o apoio marioritario recibido pola súa candidatura?
A valoración non pode ser máis ca positiva. Sería sempre positiva aínda que o apoio fóra o 50,08%. Ter a maioría absoluta para gobernar supón que a maioría do partido che di queremos que sexas ti o que lidere o partido no futuro. Entón, amplamente satisfeito, cun sentido da responsabilidade enorme. Agradecido ao traballo de todos os colaboradores que estiveron crendo nesta idea dende o principio, que saben que é unha idea honesta, que é unha idea leal, unha idea de servizo a Ourense e sobre todo unha mensaxe de atracción aos novos afiliados que virán sumarse a este gran proxecto colectivo que é o partido dos ourensáns.
Xa adiantou as bases do seu programa pero ¿en que se vai empezar a traballar a partir de agora?
O 1 de febreiro celebramos no Barco, en Valdeorras, o Comité de Dirección, é a primeira xuntanza do Comité de Dirección do partido, cumprindo un dos compromisos do noso programa. Todas as semanas faremos efectivo algún tipo de actuación que materialice ese desexo porque se revitalice o novo Partido Popular de Ourense. Con total tranquilidade, cunha forza tremenda vista a ilusión, a xenerosidade, a lealtade que amosan os membros do comité executivo do partido e ábrese una porta ao futuro de par en par no que temos que despregar un protagonismo absolutamente incontestable.
Texto: PGL/Ourense Foto: Carlos G. Hervella
(A entrevista íntegra pode lerse na edición en papel do periódico O Sil).