Esgotados logo dunha viaxe relámpago a Madrid en pleno acendido da iluminación de Nadal, pero moi satisfeitos co traballo e sobre todo contentos pola acollida e o trato recibido, volvían os membros do Orfeón Trivés de Madrid, onde o sábado 22 de novembro celebraban o día da patroa dos músicos, Santa Cecilia, cun espectactular, entrañable e nostálxico concerto no Centro Galego.
Nunha sala chea de xente, moita da zona interior de Ourense (A Pobra de Trives, Vilamartín de Valdeorras, As Ermidas, Sobrado,…) entre a que destacaba o presidente de Asomega (o doutor trivés Julio Ancochea), o Orfeón Trivés despregaba todo o seu engado e potencial nunha tarde marcada polo sentimento e a memoria, coa música e raíz galegas como protagonistas en pleno corazón madrileño, moi preto da Porta do Sol.
Tal como explica a directora, Sandra González, foi un concerto longo, de máis de dúas horas, que comezaban cunha primeira parte variada, algunha peza sudamericana, tamén sacra… No descanso actuaba Agrupación Artística Rosalía de Castro, con bailes incluídos e de seguido ía segunda parte do orfeón, toda en galego, contando coa inestimable colaboración do pianista trivés Fabio Álvarez, interpretando Quen poidera namorala. “Tamén contamos cunha gaiteira da Agrupación, María, e todo sen ensaialo previamente porque Fabio e María estaban en Madrid e nós en Trives polo que cada un ensaiou polo seu lado e foi todo un pouco improvisado pero saíu moi ben a verdade”, di Sandra, destacando a interpretación de Adiemus que estreaban alí así como do Himno Galego, conxuntamente. “Tamén lle adicamos a Julio o tema Te quiero que lle gusta moito”, puntualiza Sandra.
Pola súa banda Fabio tamén interpretou unha peza de Ricardo Curtier datada en Trives e que el mesmo arranxou, poñendo o broche musical á velada na que non faltaron as emotivas intervencións, o intercambio de agasallos e a degustación de Bica de Trives e viño.
Esta actuación contou co da Secretaría Xeral de Emigración da Xunta de Galicia, contando co apoio do director xeral Antonio Rodríguez Miranda, e do presidente de Asomega e a colaboración de Coren e das panaderías de Trives que lles cederon as bicas para a degustación e do Concello de Trives.
Aproveitando a viaxe, ao día seguinte facían unha excursión cultural por Segovia onde comían antes de regresar a casa moi satisfeitos. “O presidente do Centro Galego díxonos que nos sete anos que levaba no cargo, este fora o evento máis multitudinario e bonito que celebraran e de feito nós sentimos o calor da xente. Foi todo como moi cercano e disfrutámolo moito”, di Sandra, recoñecendo que o cariño que recibiron compensou o cansancio.
“A experiencia foi fantástica, de 10, e o concerto saíu perfecto, cantaron co corazón na man e fixérono moi ben”, asegura a directora do Orfeón Trivés, avanzando que o vindeiro 6 de decembro terán no Auditorio Julio Vázquez de Trives un concerto xunto á Rondalla Vila das Pontes. Será ás 18:30 horas.
Fotos: Nacho Moreno e cedidas.
Vídeo cedido.