O turismo enogastronómico constitúe un vector esencial na desestacionalización da oferta, así como na súa contribución ao redistribuír no territorio os recursos turísticos e, con eles, ás persoas visitantes. Así o destacaba o director de Turismo de Galicia, Xosé Manuel Merelles, no marco da mesa redonda “O potencial do enoturismo en Valdeorras”, coa que se poñía o ramo á XIII Semana de Historia do Instituto de Estudios Valdeorreses na tarde deste 28 de novembro na Casa Grande de Viloira (O Barco).
Merelles consideraba un acerto a iniciativa desta entidade de centrar a temática desta edición na viticultura e no enoturismo en Vadeorras, tendo en conta que este sector representa “unha das actividades máis importantes economicamente, socialmente e tamén un escaparate fundamental para o territorio”.
E poñendo o foco no enoturismo resaltaba que se trata “dunha actividade turística en auxe e que en Galicia agora mesmo conta cun potencial extraordinario, en calquera dos cinco territorios vitivinícolas da nosa comunidade xurden iniciativas que están a atraer non só a visitantes galegos que queren coñecer como se elabora o viño ou se cultiva as vides e a ideosincrasia dos territorios, senón tamén do resto de España e, o que é máis importante, do resto do mundo, porque cada vez son máis os estranxeiros que se achegan ata aquí buscando experiencias orixinais e de contacto co propio territorio e aí nós temos moito que contar en canto ao enoturismo”.
Ademais Merelles lembraa que a Estratexia de turismo 2030 recoñece a gastronomía e a enoloxía como activos de interese na configuración dunha oferta diferencial. “É por iso que desde a Xunta de Galicia se traballa en iniciativas concretas que potencien estes recursos”, abundou, parándose en proxectos como o Plan territorial de sustentabilidade turística de enogastronomía. Este precisamente centra un dos seus Plans de Sustentabilidade Turística en Destino (PSTD) na comarca, a través do PSTD ‘Valdeorras, Ruta do Viño Milenaria’, dotado con 1,5M€.
O director da Axencia de Turismo de Galicia era un dos cinco relatores que participaban na mesa redonda, na que tamén interviñan o director xeral do grupo Méndez-Rojo, con adegas nas cinco denominacións de orixe, Juan Luis Méndez; o propietario de Adega Algueira e restaurante O Castelo, Fernando González; o xerente de Bodegas Ladairo, Víctor Manuel López; e o xerente da adega Cova da Xabreira e do restaurante do mesmo nome en Seadur (Larouco), Simón Val.
Nas súas diferentes intervencións estes empresarios e adegueiros ían detallando a historia do seu proxecto e a súa experiencia con respecto ao enoturismo, así como o enfoque que lle dan. Eran proxectos algúns cunha traxectoria considerable e outros que están avanzando, ligados a elementos singulares de cada territorio vitivinícola.
Este acto, que completaba o programa da Semana de Historia, abríase coas intervencións do director de Turismo de Galicia que, antes de dar paso á mesa redonda, estaba acompañado polo alcalde do Barco Aurentino Alonso, e polo presidente do IEV, Aurelio Blanco Trincado. E como broche tiña unha degustación de viño.
Neste outono a Semana de Historia do IEV retomaba a súa celebración tras unha paréntese de dúas décadas.
Fotos e vídeo: Carlos G. Hervella.
