Castellón dará a oportunidade esta fin de semana a un total de quince dos máis telentosos lanzadores galegos das categorías base, a tomar parte no campionato de España de lanzamentos longos para as categorías Sub16, Sub18 e Sub20.
Entre eles haberá dous valdeorreses de categoría Sub16, Sergio Fernández en disco (que tamén participaba a pasada fin de semana en peso no nacional de pista cuberta Sub16 en Ourense) e Javier Cid no lanzamento de martelo. Ambos visten a camiseta do Club Adas Cupa do Barco.
Ademais dentro da representación galega estarán varios dos medallistas nacionais nos últimos campionatos que acuden a esta primeira gran competición importante de aire libre da tempada como é o caso da internacional e campioa de España Sub18 do ano pasado Blanca Pereira do Ourense Atletismo quen esta tempada estrea categoría Sub20. Mesmo caso é o do campión de España 2022 en xavelina Enzo López do Barbanza que vai estar tomando parte como atleta Sub18.
A subcampioa nacional en xavelina Lara Iglesias do Barbanza intentará estar nos postos de honra na mesma modalidade no seu debut na categoría Sub18.
O concurso de martelo Sub16 será unha das probas máis interesantes do campionato grazas a participación das atletas Marta Hermida e a subcampioa nacional Mar Simón, ambas do Celta Atletismo, líderes destacadas do ranking nacional e separadas entre elas por tan só catro centímetros.
Hugo Casañas do Rías Baixas será outro dos atletas importantes. O de Pontevedra xa gañaba o ano pasado o nacional Sub14, logrando recentemente tanto o subcampionato nacional de pista cuberta como o récord galegos Sub16 en peso.
A internacional e subcampioa nacional en peso Xiana Lago do Ría Ferrol, estará tamén poñendo a proba a súa preparación tomando parte neste lanzamento longo de disco Sub20. Na mesma categoría e modalidade o coruñés do Atletismo Sada Nicolás Ortega, intentará repetir o podio que xa conseguira o ano pasado nos nacionais de Torrent.
Por último Antía Otero do Atletismo Narón será outra das atletas que aspiren a reeeditar e mesmo mellorar, o seu terceiro posto do ano pasado no concurso de xavelina Sub16.
