É un dos momentos máis intensos e quizais máis emotivos do Entroido vianés. Contra as doce da noite do Martes de Entroido, na praza Maior da vila, alfombrada de fariña, resoa con toda a súa forza o fulión. Numerosos veciños batendo bombos e aixadas reúnense para facerse sentir con intensidade nos últimos momentos da festa.
Este atroador ritmo non deixa de soar mentres comeza a queima do Lardeiro e da Lardeira que nestes días presidían o Entroido pendurados dun longo pau na mesma praza. Mentres ardían e estoupaban, esvaecíase pouco a pouco con eles este tempo de troula que se vive cun fondo sentimento en Viana do Bolo.
A despedida final será esta tarde co Enterro da Sardiña, seguido de sardiñada no Cabo da Vila.
Fotos e vídeo: Carlos G. Hervella.
