Na mañá deste sábado 11 de outubro, máis de 50 persoas convocadas por ABANCA e a súa Obra Social participaban en Manzaneda na primeira xornada de voluntariado ambiental organizada no marco do Plan de Acción contra os incendios posto en marcha polo banco, en colaboración con Afundación, no mes de agosto.
Tal como explican dende a organización, a actividade centrouse na protección dalgúns acuíferos especialmente afectados polos lumes. En concreto, “os traballos realizáronse nas beiras e zonas lindeiras ao Rego da Mourela, no lugar de Tonxil, pertencente á parroquia de Placín do concello de Manzaneda, unha fermosa paraxe fortemente castigada polos incendios”.
Os voluntaris dividíronse en varios grupos para levar a cabo diferentes tarefas planificadas durante os días de inspección previos á actividade. “Nos lugares de forte pendente nos que apenas quedan restos de vexetación tras os lumes, centráronse na construción de pequenas barreiras feitas a base de pedras que permitirán controlar a erosión do chan e evitar o arrastre de cinzas cara ao leito do río cando cheguen as choivas”, explican. Por outra banda, e coa mesma finalidade, “naqueles lugares nos que aínda persiste algunha ramaxe queimada e non se reduciu todo a cinzas, construíronse faixas a base de pequenas estacas de madeira e ramas entrelazadas”.
De forma complementaria o resto de voluntarios dedicáronse ao mulching, unha técnica consistente na difusión de certa cantidade de palla nas zonas queimadas, espidas de vexetación, co fin de protexer os chans da erosión que poden producir as choivas, evitar o arrastre de cinzas cara ao río, e contribuír á rexeneración da vexetación nestes lugares, grazas para o efecto de retén da humidade do chan e a regulación da temperatura, evitando a exposición directa ao sol.
Ademais das entidades organizadoras e das persoas voluntarias que colaboraron desinteresadamente ao longo de toda a xornada, a actividade contou tamén co apoio da Xunta de Galicia e a Confederación Hidrográfica Miño-Sil.
Medidas do Plan de Acción
Segundo indican dende ABANCA, esta primeira actividade de voluntariado marca o inicio do Plan de Acción contra os incendios deseñado en colaboración con Afundación, co obxectivo de “contribuír á recuperación económica, social e ambiental das áreas danadas, así como a incrementar o seu nivel de protección e capacidade de resposta fronte a situacións futuras”.
Máis aló da restauración ambiental, o paquete de accións previsto inclúe “unha liña de financiamento de 150 millóns de euros dirixida a familias e empresas, anticipos para as indemnizacións de seguros e outras axudas públicas, axilizar o abono das indemnizacións do seguro aos seus clientes, adiantar as axudas da PAC a tipo 0% e aplicar preautorizados nos casos que proceda”.
O plan tamén conta cunha dotación “dun millón de euros para a adquisición de material e outros recursos para a prevención de futuros lumes”. Neste marco, ABANCA “proporcionará tecnoloxía de vixilancia (drons) á Xunta de Galicia e achegará kits de emerxencia con material de resposta rápida, tanto para os concellos afectados como para os declarados de alto risco”, avanzan dende a entidade bancaria.
Por último, impulsarán “accións de formación e de concienciación cidadá ao redor da prevención dos incendios e da resposta inmediata fronte aos mesmos, prestando apoio financeiro para a formación de grupos profesionais, ademais de colaborar en proxectos de investigación vinculados coa extinción dos lumes e coa xestión do territorio a través da implicación da Universidade Intercontinental da Empresa (UIE)”.
Fotos e vídeos: Carlos G. Hervella, agás a primeira da galería.