O subdelegado do Goberno en Ourense, Eladio Santos, pediu “prudencia e responsabilidade” á cidadanía “para desfrutar dun Entroido divertido e seguro” na cidade de Ourense. Díxoo durante a Xunta Local de Seguridade que presidiu esta mañá para coordinar o dispositivo especial que controlará o correcto funcionamento das celebracións que terán lugar do 12 ao 18 de febreiro.
Tamén participaron na reunión o delegado territorial da Xunta, Manuel Pardo; o secretario xeral da Subdelegación do Goberno, Manuel Arias; o asesor da área de Seguridade Cidadá do Concello, Laureano Bermejo, as xefas das unidades de Protección Civil da Subdelegación, Mari Carmen Lodos, e Violencia sobre a Muller, Alida Iglesias, e representantes da Policía Nacional, Policía Adscrita e Policía Local, así como membros de asociacións veciñas e de comerciantes.
O operativo deseñado para garantir a seguridade no Entroido de Ourense, no que se espera unha importante afluencia, está formado por Policía Nacional, Policía Local, Protección Civil, bombeiros de Ourense, Emerxencias do 112 Galicia, seguridade privada e servizos sanitarios. En concreto, instalarase un Posto de Mando Avanzado no Concello desde o sábado ao luns e un hospital de campaña na contorna da Catedral, pola zona superior. Ademais, os profesionais da seguridade privada encargaranse dos controis de acceso á Praza Maior e á Rúa do Progreso os días de actuacións musicais.
“Haberá presencia policial reforzada e atención permanente ante calquera incidencia. Todo está pensado para que poidamos desfrutar da nosa festa con tranquilidade e que este sexa outro Entroido memorable en Ourense”, subliñou o subdelegado. Así, a Policía Nacional matizou que se reforzará o seu número de efectivos con unidades externas durante as noites para exercer especial vixilancia nos puntos de maior afluencia, previsiblemente, a zona comprendida entre a Praza Maior, Rúa do Progreso, Santa Eufemia e Praza do Correxidor.
Así mesmo, o Concello instalará un Punto Violeta durante as festas nos soportais da Praza Maior. A xefa da Unidade contra a Violencia sobre a Muller da Subdelegación, Alida Iglesias, agradeceu a iniciativa, porque “o Punto Violeta é unha ferramenta moi útil contra as agresións porque presta auxilio ás vítimas, ofrece información e ten un importante efecto disuasorio”.
Como é habitual, a Xunta Local de Seguridade abordou tamén o estado da seguridade cidadá en Ourense. A Policía Nacional indicou que se rexistrou nos últimos meses unha diminución dos delitos coñecidos contra as persoas e o patrimonio, á vez que aumentou o esclarecemento. Actualmente, a maior problemática está relacionada coas estafas e delitos asociados ás novas tecnoloxías.
Violencia de Xénero
En canto á violencia de xénero, existen nestes momentos 178 casos activos no Sistema VioGén na cidade de Ourense, dos que 122 están en seguimento por parte da Policía Nacional; 26, por parte da Policía Adscrita (UPA) e 30 pola Policía Local. “O comezo deste ano trouxo cifras alarmantes, con 6 mulleres asasinadas en España, o que quere dicir que temos que seguir implicándonos con unidade na loita contra a lacra da violencia de xénero”, remarcou Eladio Santos.
Plan Director
Respecto ao repaso do Plan Director para a convivencia e mellora da seguridade nos centros educativos e nas súas contornas, a Policía Nacional destacou como positiva a tendencia á alza experimentada na solicitude de charlas nos centros educativos da cidade, xa que no que vai do presente curso escolar ofrecéronse 107, fronte ás 83 do mesmo período do curso anterior. En concreto, 65 das charlas destináronse a alumnado de primaria, co acoso escolar e o ciberacoso como principais temas demandados.