A cova pública do núcleo de Seadur (Larouco) constitúe un “exemplo da estratexia do Goberno de incluír aos residentes e produtos autóctonos no ecosistema turístico”. Así o destacaba o subdelegado do Goberno en Ourense, Eladio Santos, que visitaba este 27 de marzo esta construción etnográfica ligada ao pasado vitivinícola valdeorrés para comprobar o resultado dunha das accións incluídas no Plan de Sostibilidade Turística en Destino (PSTD) “Valdeorras, ruta do viño milenaria”, convocado e financiado polo Ministerio de Industria e Turismo.
Eladio Santos visitaba o núcleo de Seadur, coñecido pola súa tradición vitivinícola e, especialmente, polo conxunto singular de bodegas escavadas no terreo, as famosas covas. Unha delas, propiedade da Asociación As Covas de Seadur e cedida ao Concello de Larouco, que a rehabilitou para o uso da cidadanía, cunha axuda de 150.000 euros do PSTD e quere convertela nun centro de interpretación do viño. Así llo trasladaron a alcaldesa do municipio Patricia Lamela, e o vogal da asociación Miguel Ángel Rodríguez.
A alcaldesa de Larouco, que cualificaba de “grandiosa a obra de rehabilitación desta cova que se fixo grazas aos fondos do ministerio”, enmarcaba esta iniciativa no “camiño que segue o Concello dende que cheguei á alcaldía hai seis anos, que é manter o noso patrimonio o máis vivo posible con vitalidade e con crenza de pertenza, de aí que a Asociación das Covas de Seadur mercara o inmoble e grazas a axuda do ministerio puidemos realizar unha rehabilitación que quedou tan bonita”.
O subdelegado destacaba que “daba gusto ver unha acción deste tipo completamente rematada, que ademais, recolle todo o espírito dos plans de sostibilidade que buscaban cambiar o modelo estratéxico de turismo para Galicia, reúne as condicións para cumprir os obxectivos da estratexia turística do Goberno de España, centrados no modelo de triple sustentabilidade: económica, social e ambiental”. “Esta é unha aposta por un turismo respectuoso e desestacionalizado que desfrute da integración coa vida no rural e que poña en valor os nosos produtos gastronómicos”, sinalou.
Neste sentido, Eladio Santos lembrou que no ano 2020, cando o Goberno de España decidiu reforzar a aposta polo turismo coas entidades locais a través dos PSTD, buscaba transformar o sector turístico do país, impulsar un novo modelo máis eficaz. “Esta estratexia xa se pode ver e desfrutar con proxectos tan transformadores como este do que xa poderán desfrutar veciños, veciñas e visitantes o vindeiro sábado 4 de abril na ruta das Covas de Seadur 2026”, sostivo Eladio Santos, quen deu as grazas ao Concello de Larouco e ao GDR Valdeorras pola súa implicación.
En concreto, o subdelegado explicou que o PSTD de convocatoria extraordinaria “Valdeorras, ruta do viño milenaria”, xestionado pola Asociación GDR Valdeorras, recibiu 1,5 millóns de euros de financiamento de fondos Next Generation por parte da Secretaría de Estado de Turismo. “Este plan dotado de recursos está a ser un revulsivo para a comarca de Valdeorras, que diversificou a súa oferta turística con resultados óptimos”, apuntou.
Impulso ás covas
Esta acción non é a única de impulso ás tradicionais covas de Seadur por parte do Goberno de España. Por iso, o subdelegado achegouse ao restaurante e bodega A Cova da Xabreira, que recibiu unha axuda de 171.220 euros do Plan de Recuperación, Transformación e Resiliencia do Goberno de España, dotado con fondos europeos Next Generation. A subvención destínase á rehabilitación sostible das bodegas e a súa contorna, así como a un conxunto de experiencias virtuais da visita ás adegas.
Eladio Santos agradeceu ao dono do establecemento, Simón Val, a súa aposta polo rural e a tradición, xa que proxectos como o seu son os que atraen visitantes ás pequenas vilas e aldeas da provincia. “É satisfactorio que os fondos desta gran aposta polo turismo sostible do Goberno de España cheguen á xente con proxectos innovadores e que dan a coñecer a nosa tradición”, remarcou.
Fotos e vídeo: Carlos G. Hervella.
