Co obxectivo de reforzar a visión de Cupa Group a “longo prazo”, o conselleiro delegado deste grupo, Javier Fernández, daba a coñecer nesta semana varios “movementos clave” na súa estrutura directiva. Así, Fernando Bandrés Diéguez vén de facerse cargo da nova Dirección de Desenvolvemento Estratéxico. “A súa visión transversal e capacidade analítica serán o motor dos nosos proxectos máis transformadores”, en palabras de Fernández.
Por outra banda, Javier Q. toma o temón como director xeral do core business do grupo, “La Pizarra”. “Falar de Javier é falar de 19 anos de historia nesta casa. Desde a creación de Cupa USA ata a dirección comercial de Cupa Pizarras, foi un arquitecto fundamental da nosa expansión. A súa experiencia e coñecemento de cada engrenaxe son a nosa maior garantía de éxito”, engade o conselleiro delegado do grupo.
Ademais, Javier Estévez Ferreira asume a Dirección Comercial de Cupa Pizarras. Del, Javier Fernández di que é “un exemplo de talento interno, compromiso e preparación que nos enche de orgullo”.
Con estas modificacións, concluía Fernández, “seguimos construíndo un grupo máis sólido cos mellores profesionais á fronte”.