Na noite do sábado 17 de outubro producíase un incendio que calcinaba unha casa no municipio da Pobra de Trives, tal como informan dende o 112 Galicia, indicando que “outra vivenda que estaba pegada tamén sufriu danos e unha persoa foi atendida no punto por unha crise de ansiedade”.
O 112 Galicia tiña constancia deste lume a través dun particular, pasadas as 22:10 horas, “estaba a arder unha habitación nunha casa situada no lugar de Monteboi, en Sobrado”, indicaba o informante, “confirmando que ningunha persoa resultara ferida”.
Así, os xestores do Centro Integrado de Atención ás Emerxencias activaban un operativo no que participaron Urxencias Sanitarias de Galicia-061, a Garda Civil, o GES de Castro Caldelas e os voluntarios de Protección Civil da Pobra de Trives. “O distrito forestal da zona, de Medio Rural, tamén enviaba medios para colaborar neste incendio”, engaden dende o 112.
Pouco despois das 23:30 horas, “os servizos de emerxencias daban o incendio por controlado, pero continuaron traballando na zona durante horas ata que as lapas quedaron completamente apagadas, pasadas as 2:30 horas da madrugada”.
Tal como conclúen dende o 112, “o incendio queimou por completo unha casa, colapsando o tellado, mentres que a vivenda contigua viuse parcialmente afectada”.