Vera Rodríguez González continúa o seu progreso deportivo, consolidándose como unha das xoves promesas do fútbol sala feminino galego. A xogadora barquense, actualmente no Ourense Ontime, foi novamente convocada pola Selección Galega Sub16, un logro que confirma a súa traxectoria ascendente e o nivel competitivo que vén demostrando nos últimos anos.
Con esta convocatoria, Vera suma o seu terceiro ano consecutivo defendendo a camiseta de Galicia, o que pon en valor o seu “compromiso, sacrificio e constancia dentro e fóra da pista”, cunha “evolución técnica e madurez deportiva” determinantes para que o corpo técnico volva confiar nela para o combinado autonómico.
A xogadora afronta esta convocatoria coa chegada a unha nova categoría con Jairo Campo como adestrador da Selección Galega Sub16, con quen comezará nos próximos días o ciclo de adestramentos preparatorios. Comeza así unha nova e renovada fase para o equipo, na que Vera volverá ser unha das xogadoras destacadas.
Esta nova etapa coa selección galega non só representa un recoñecemento persoal para a xove deportista valdeorresa, senón tamén “un exemplo do enorme esforzo que realiza no mundo do fútbol sala, onde a súa disciplina, intensidade e talento seguen marcando diferenzas”, asegura o seu pai, destacando que encara esta nova convocatoria “coa ilusión intacta e co obxectivo de seguir crecendo, competindo e levando a Galicia ao máis alto”.
Fotos cedidas.