A Confederación Hidrográfica do Miño-Sil (CHMS) intensifica os traballos de conservación e mellora dos leitos da demarcación co obxectivo de favorecer a adaptación ao cambio climático e a prevención do risco de inundacións. Actuacións que supoñen un investimento de 7.811.922€, cofinanciadas polo Fondo Europeo de Desenvolvemento Rexional (FEDER), cunha achega do do 60% do orzamentado, 4.687.153€; no marco do Programa Operativo Plurirregional de España 2021-2027.
Cabe indicar que o pasado 11 de marzo a Dirección Xeral de Servizos do MITECO comunicou a resolución de cofinanciamento e as condicións da mesma, con carácter retroactivo desde 2023. Enmarcado no “Servizo de conservación e mellora ambiental dos leitos da Demarcación Hidrográfica do Miño- Sil en Galicia 2023”, iniciado o 19/06/2023, cun período de vixencia de 36 meses e executado no ámbito territorial da CHMS en Galicia (provincias de Lugo, Ourense e Pontevedra).
“Traballos programados co obxectivo de conservar e restaurar a hidromorfoloxía natural dos leitos para mellorar a súa resiliencia e adaptación ao cambio climático”, explicaba Quiroga. “Ao mesmo tempo, preténdese minimizar o risco de inundacións en núcleos urbanos, infraestruturas ou parcelas próximas aos leitos fluviais; mediante traballos silvícolas cos que se conseguirá mellorar ou restaurar o bosque autóctono de ribeira, recuperando a morfoloxía fluvial natural a través da retirada de barreiras artificiais que modifiquen o comportamento do río” incidiu o presidente.
“Realizaranse, ademais, actuacións de restauración hidrolóxico-forestal para o control da erosión e a protección de marxes en zonas concretas, a través de solucións baseadas en técnicas non invasivas e ambientalmente sostibles”, concluíu o presidente. Estas actuacións enmárcanse dentro do Obxectivo Específico 2.4, que pretende “Favorecer a adaptación ao cambio climático e a prevención do risco de catástrofes, así como a resiliencia, tedo en conta os enfoques baseados nos ecosistemas”, que están suxeitas ao cumprimento da Condición Favorecedora 2.4 “Marco eficaz de xestión do risco de catástrofes “de acordo con o establecido no Regulamento (UE) 2021/1060 do Parlamento Europeo e do Consello.
OURENSE
LUGO
