A Denominación de Orixe Ribeira Sacra pechou a campaña de vendima 2026 tras 46 días de recolección, desde o 12 de agosto ata o 26 de setembro, cun balance positivo tanto desde o punto de vista produtivo como sanitario e cualitativo. A campaña estivo marcada por un inicio excepcionalmente temperán, condicionado pola evolución da maduración da uva, e por unhas condicións que permitiron desenvolver a recolección de maneira progresiva, adaptándoa ao momento óptimo de maduración das diferentes parcelas e variedades.
En total, durante a vendima 2026 foron recollidos 5.446.859 quilos de uva amparada, fronte aos 4.620.524 quilos rexistrados en 2025 e aos 4.900.018 de 2024. Isto supón un incremento do 17,9 % respecto de 2025 e do 11,2 % respecto de 2024.
Excelente estado sanitario da uva
Un dos aspectos máis salientables desta campaña foi o excelente estado sanitario da uva recibida nas adegas. Non se rexistraron incidencias de especial relevancia que comprometesen a calidade da colleita e a uva chegou ás adegas en moi boas condicións. As condicións meteorolóxicas rexistradas ao longo do ciclo vexetativo favoreceron unha correcta evolución da maduración e permitiron realizar a vendima de forma escalonada, adaptándoa ás características e ao momento óptimo de cada parcela.
Desde o Consello Regulador considérase que as condicións observadas durante a campaña permiten afrontar a elaboración dos viños da colleita 2026 con expectativas favorables desde o punto de vista cualitativo.
Mencía e Godello concentran o 88,9 % da produción
A Mencía mantívose como a variedade maioritaria da Denominación de Orixe, cun total de 3.795.035 quilos, fronte aos 3.195.075 de 2025 e aos 3.675.475 de 2024. A Godello, pola súa banda, acadou os 1.048.256 quilos, continuando a súa evolución ascendente e superando os 924.432 quilos de 2025 e os 721.916 de 2024. Entre ambas as variedades suman 4.843.291 quilos, o que representa o 88,9 % do total da uva amparada recollida nesta campaña.
No que respecta ao resto das variedades, a Garnacha rexistrou 138.184 quilos e o Sousón 111.183 quilos. O Brancellao acadou os 82.994 quilos, mentres que a Treixadura alcanzou os 69.741 quilos. Tamén se recolleron 59.226 quilos de Albariño, 51.895 quilos de Merenzao, 39.743 quilos de Caíño e 18.847 quilos de Tempranillo.
Completaron a produción 11.452 quilos de Branco Lexítimo, 8.085 quilos de Dona Branca, 5.548 quilos de Mouratón, 3.670 quilos de Loureira, 2.080 quilos de Torrontés, 920 quilos de Grao Negro e 0 quilos de Caíño Branco.
En total, as diferentes variedades amparadas contabilizaron os 5.446.859 quilos de uva recollidos durante a campaña 2026.
821 provedores e 755,84 hectáreas vendimadas
Durante a campaña 2026 contabilizáronse 821 provedores de uva, fronte aos 650 de 2025 e aos 697 de 2024.
A superficie vendimada alcanzou as 755,84 hectáreas, das 1.263,22 hectáreas inscritas na Denominación de Orixe. O Rexistro de Viticultores conta actualmente con 1.671 viticultores inscritos e 94 adegas
Primeira campaña coa implantación de ANAWIN
A vendima 2026 supuxo tamén un paso adiante no proceso de dixitalización da xestión da Denominación de Orixe coa posta en marcha do sistema ANAWIN.
A través desta ferramenta, as adegas declaran a uva recibida, identificando a parcela de procedencia e incorporando a información correspondente á recepción da materia prima.
A implantación deste sistema permite dispoñer dunha información máis estruturada e actualizada e reforza o control, a trazabilidade e a transparencia do proceso de vendima, facilitando o seguimento da uva desde a súa orixe ata a súa entrada na adega.
Esta primeira campaña de aplicación de ANAWIN supón así un avance na modernización da xestión da Denominación de Orixe e na capacidade de seguimento da produción amparada.
Desde o Consello Regulador faise unha valoración positiva da campaña e ponse especialmente en valor o traballo desenvolvido polos viticultores e viticultoras e polas adegas durante estas semanas.
A particular orografía da Ribeira Sacra e as características da súa viticultura fan da vendima un proceso especialmente esixente. As fortes pendentes, a fragmentación das parcelas e o importante peso do traballo manual requiren un esforzo adicional por parte das persoas que participan na recolección.
A coordinación entre viticultores, adegas e persoal encargado dos controis resulta fundamental para garantir que a uva chegue ás adegas nas condicións adecuadas e que se manteña o control sobre a súa procedencia ao longo de todo o proceso.
Co remate da vendima, comeza agora unha nova etapa centrada na elaboración dos viños da colleita 2026. As condicións nas que se desenvolveu a campaña, xunto co excelente estado sanitario da uva e a súa adecuada evolución de maduración, permiten afrontar esta fase con expectativas favorables.
O Consello Regulador quere agradecer finalmente o traballo e a colaboración de viticultores, adegas e persoal implicado no desenvolvemento da vendima, fundamentais para o correcto funcionamento dunha campaña que pecha cunha produción de máis de 5,4 millóns de quilos de uva amparada