A D.O. Ribeiro recibiu un total de 30 galardóns nos premios ‘Decanter World Wine Awards’, un concurso internacional de viño que se celebrou en Londres (Reino Unido) en maio. O concurso outorgou á Denominación de Orixe máis antiga de Galicia 3 medallas de ouro, 17 de prata e 10 de bronce, converténdoa deste xeito na máis premiada de Ourense.
Os tres galardóns de ouro foron para os viños brancos:
Catro Parroquias Godello 2025, Catro Parroquias Treixadura 2025 e Ramón do Casar Nobre 2024. As 17 distincións de prata recaían nas referencias Armán Finca Os Loureiros 2023, Casal de Armán 2024, Costeira Treixadura 2025, Cunqueiro Tercer Milenium 2025, Cuñas Davia barrica 2023, Fornela 2025, Laudes 2024, Maleiga Intre 2024, Maleiga Lapso 2024, Máis de Cuqueiro Torrontés 2025, Meu Albariño 2025, O’Pazo 2025, Sybaria 2025, Ramón do Casar Varietal 2025, Ramón do Casar Treixadura 2025, Ramón do Casar Godello 2024 e Ramón do Casar Lento 2024.
Por último, as marcas Adega do Moucho 2022, Colección 68 2025, Gran Alanís Castes Blancas 2025, Máis de Cunqueiro Godello 2025, Míster Godello 2024, Samiel Godello 2025, Santerra Godello 2024, Tamborá 2025, Teixadal 2025 e Val de Nairoa 2022 eran premiados cun galardón de bronce.
“Destacamos a progresión de magníficos resultados que a nosa D.O. logra ano a ano neste concurso internacional de tanta relevancia; analizándoo de modo global, os nosos viños elaborados con variedades preferentes son moi apreciados polos catadores expertos a nivel mundial”, comenta, Concha Iglesias, presidenta do C.R.D.O. Ribeiro.
Decanter World Wine Awards
Os premios Decanter World Wine Awards (DWWA) celebraron este ano a súa 23ª edición. Desde a súa creación, os DWWA consolidaron a súa reputación como o maior e máis influente concurso de viños do mundo, aclamado polo seu rigoroso proceso de avaliación a cegas. Durante dúas semanas en maio, reuníronse ao redor de 250 dos expertos en viño máis prestixiosos do mundo, entre os que se inclúen críticos de renome, xornalistas, catadores galardoados e compradores de viño.