Xunta de Goberno da Deputación de Ourense aprobou esta mañá un total de 19 asuntos de xestión, ademais da acta da sesión anterior, mobilizando no seu conxunto 861.476,21 euros destinados a reforzar a cooperación cos concellos e apoiar ás familias da provincia.
Do total aprobado, 461.476,21 euros corresponden a cooperación municipal, mentres que 400.000 euros se destinan ao Programa CHEGOU 2026.
Luis Menor sintetizou na rolda de prensa posterior á Xunta de Goberno que a sesión mobilizou 861.476,21 euros, dos cales máis de 461.000 euros van directamente aos concellos en actuacións de cooperación municipal, mentres que 400.000 euros sosteñen un programa social estratéxico como o ChegOU.
“A Deputación reafirma así o seu papel como administración próxima ao territorio, centrada en resolver problemas concretos e garantir igualdade de oportunidades en toda a provincia”, concluiu Menor.
O bloque principal da sesión volveu ser a cooperación municipal, con axudas directas a 14 concellos da provincia, destinadas fundamentalmente a melloras de infraestruturas, saneamento, alumeado público, equipamento municipal e actuacións viarias.
A distribución das achegas é a seguinte: Monterrei (68.288 euros); Paderne de Allariz (33.000 euros); Beade (40.000 euros); O Bolo (1.900 euros); O Carballiño (48.262,45 euros); Castrelo de Miño (11.513,84 euros); Celanova (49.990,26 euros); Cualedro (14.637,23 euros); Laza (45.000 euros); Padrenda (40.000 euros); Petín (19.167,55 euros); Porqueira (15.000 euros); Ribadavia (29.998 euros); e Riós (44.718,88 euros).
Estas actuacións permitirán executar proxectos orientados a resolver necesidades reais e inmediatas da veciñanza, reforzando o equilibrio territorial e o apoio aos municipios, especialmente aos máis pequenos.
Programa ChegOU: estabilidade e compromiso coas familias
A Xunta de Goberno aprobou tamén as bases reguladoras do Programa ChegOU 2026, que contará cunha partida inicial de 400.000 euros, ampliable se fose necesario.
A contía mantense estable respecto aos últimos anos, consolidando esta liña de axudas como unha ferramenta clave na loita contra o reto demográfico na provincia.
Segundo destacou o presidente provincial, “non hai recortes nin improvisacións; hai estabilidade e compromiso para garantir que este apoio chegue a todos os fogares que o precisen”.
Menor subliñou que o ChegOU é unha resposta directa ao reto demográfico e enmárcase na estratexia marcada pola Lei de impulso demográfico de Galicia, consolidándose como unha das principais ferramentas provinciais de apoio á natalidade.
Impacto e eficiencia: os datos de 2025 avalan o modelo
A edición 2026 do programa apóiase nos datos do exercicio 2025, que confirmaron a súa solidez e eficiencia:1.135 solicitudes recibidas, con 1.054 solicitudes admitidas, o que supón case un 93 % de admisión; 163 solicitudes procedentes de concellos de grao 2 e 3, prioritarios desde o punto de vista demográfico; 32 solicitudes con supostos de discapacidade ≥33 %.
As axudas oscilaron entre 300 e 1.250 euros, en función do concello de empadroamento e das circunstancias familiares, reforzando o compromiso da Deputación coa equidade territorial e coa protección reforzada das situacións de maior vulnerabilidade.
O programa mantén o seu carácter progresivo e territorialmente equilibrado, cunha discriminación positiva e protección reforzada: os concellos grao 0 e 1 obterán 300 euros e os de grao 2 e 3: 500 euros. Ademais, consolídanse os incrementos: plus por discapacidade ≥33 %: ata 1.000 euros; e plus por familia numerosa: 250 euros a maiores
Esta configuración confirma a vontade da Deputación de manter políticas estables no tempo, afastadas de actuacións puntuais e orientadas a dar resposta real ás necesidades das familias.
Innovación administrativa: pioneiros na sinatura biométrica vocal
Un dos aspectos máis destacados do ChegOU é o seu sistema de tramitación dixital para persoas en exclusión dixital. En 2025 incorporouse por primeira vez a sinatura biométrica vocal, permitindo tramitar solicitudes sen certificado dixital e mesmo directamente desde o hospital tras o parto.
Un total de 170 solicitudes realizáronse mediante firma biométrica vocal, procedentes de 43 concellos, o que supuxo un aforro estimado de 4.858 quilómetros en desprazamentos.
Este sistema garante plena validez xurídica, identificación segura e simplificación administrativa, combinando seguridade, accesibilidade e innovación tecnolóxica. A continuidade desta modalidade en 2026 reforza unha dixitalización útil, centrada nas persoas e adaptada á realidade territorial da provincia, explicou Menor.
A Tarxeta ChegOU
A axuda materialízase a través dunha tarxeta electrónica ChegOU para gastos de produtos de hixiene, alimentación e saúde do bebé en farmacias, parafarmacias, ópticas, centros de audición e ortopedias.
A tarxeta estará activa ata o 31 de maio de 2027, e o prazo de solicitude abrirase ao día seguinte da publicación das bases no BOP, ata o 31 de decembro de 2026, ampliándose ata o 15 de xaneiro de 2027 para nacementos a finais de ano.
Un modelo estable, equitativo e moderno
ChegOU consolídase así como unha política pública estrutural orientada a fortalecer o futuro demográfico de Ourense, combinando rigor orzamentario, equidade territorial, protección reforzada ás familias e modernización administrativa.
A Deputación de Ourense reafirma o seu compromiso coas familias da provincia, apostando por medidas concretas, eficaces e sostibles no tempo para afrontar o reto demográfico con políticas activas.