Durante o resto da tempada a Estación de Montaña de Manzaneda permanecerá aberta operando con telecadeira de catro prazas de Fontefría e dous telesquíes, despois da avaría que afectou ao telecadeira principal nunha peza chamada variador, que é a que envía as ordes ao remonte. Así o vén de asegurar a estación este mércores a través dun comunicado de prensa. Establecido o contacto coa empresa francesa que construíu o remonte principal da Estación de Montaña, POMA, esta trasladou á dirección de Manzaneda que “o fallo se atopa no variador principal ou cerebro da instalación”, estimando que o tempo para “a reparación e entrega dos circuítos electrónicos danados pode chegar a ser de 9 semanas”.
Ante esta previsión, a Estación de Montaña decidiu manter igualmente a súa actividade, aínda que durante o tempo que dure a reparación só poderá operar co telecadeira de 4 prazas de Fontefría e cos remontes localizados nesta mesma pista e na de Xeixo.
“Tanto as dúas telecadeiras, incluído o agora avariado, como os remontes da Estación de Montaña foron sometidos ás correspondentes probas de carga, funcionamento e de cables, así como ás preceptivas inspeccións técnicas, en novembro do ano pasado, superándoas todas de forma satisfactoria. Debido a esta incidencia, a partir de mañá aplicarase unha bonificación do 50% no prezo do forfait, que se manterá en 15 euros durante o resto da tempada e ata que volva entrar en funcionamento o remonte principal da Estación”, segundo informa a dirección da mesma.
Polo que respecta ao resto de servizos, permanecerán abertos con total normalidade e a pleno rendemento. A dirección da Estación de Montaña reitera “as desculpas polas molestias ocasionadas por esta avaría, que espera poida ser liquidada canto antes por parte da empresa fabricante do telecadeira”.