A moenda tradicional de olivas volvía realizarse no antigo Muíño de Bendilló (Quiroga). Numerosas persoas achegábanse a partir das 11h. deste domingo 15 marzo ata esta aldea para comprobar como era o tradicional proceso de elaboración de aceite. Estas demostracións forman parte do programa da XXVI Mostra do Aceite de Quiroga.
O muíño consta de tres elementos principais: a pía de moer, o lagar e a decandora. Grazas á forza motriz dunha burra ou mula móvese o conxunto de roda, eixo e brazo. A oliva vaise botando coa man ou con cestas na tolva de madeira que vai deixando caer ao paso da moega, a medida que vai esmagando.
Despois, as olivas moídas, convértense nunha pasta que pasa ao lagar, onde se deposita entre capachos de esparto, separando o aceite dos restos máis sólidos.
Para facilitar o acceso do público dende o recinto da Mostra do Aceite, situado na praza do Auditorio da vila de Quiroga, contábase dun servizo de autobuses de balde dende a citada praza con saídas ás 11h., ás 12h. e ás 13h. Tamén había algún peregrino que, seguindo o Camiño de Inverno, achegábase ata o muíño para velo funcionando.
Fotos e vídeo: Carlos G. Hervella.
