A parroquia da Nosa Señora de Fátima de Fontei, na Rúa, celebrará os próximos 7, 8 e 9 de outubro un triduo extraordinario na honra á nosa Señora de Fátima, co gallo do centenario das aparicións da Virxe a sor Lucía en Pontevedra (1925-1926). “Nelas, a vidente de Fátima recibiu o encargo de difundir a devoción dos cinco primeiros sábados en reparación ao Inmaculado Corazón de María”, din dende a parroquia, explicando que o triduo servirá como preparación espiritual para a peregrinación parroquial a Pontevedra do sábado 10 de outubro, onde os peregrinos participarán no Ano Xubilar concedido con motivo deste centenario.
Así, durante os tres días, a imaxe da nosa Señora de Fátima baixará do seu lugar habitual no retablo para permanecer máis preto dos fieis. “Será ademais unha ocasión especial para contemplala tras o recente labor de limpeza e conservación, que permitiu recuperar con maior claridade as cores e detalles da talla”, explica o párroco, Daniel Pérez, destacando que os fieis poderán apreciar tamén un elemento incorporado recentemente á imaxe “a coroa de espiñas dourada que rodea o corazón da Virxe, signo directamente relacionado coas aparicións de Pontevedra e coa mensaxe de reparación ao Inmaculado Corazón de María”.
Cada xornada comezará coa Santa Misa ás 20 horas, seguida do exercicio propio do triduo, que terá como lema as palabras dirixidas a sor Lucía “Ti, polo menos, procura consolarme”; e ao longo dos tres días percorreranse tres aspectos fundamentais da mensaxe de Pontevedra, “contemplar o Corazón de María, acompañala e responder á súa chamada”, adiantan dende a parroquia que convida a todos os fieis da Rúa e da comarca aparticipar nestas celebracións extraordinarias, acudan ou non despois á peregrinación a Pontevedra.