O pasado venres, 23 de outubro, a Policía Local de Ourense detiña a unha persoa durante unha intervención na vía pública na que foron localizados “37 envoltorios cunha substancia branca, aparentemente cocaína, ademais de 975 euros en efectivo”.
A actuación comezou durante un servizo de patrulla, cando os axentes deron o alto ao condutor dunha motocicleta para realizar diversas comprobacións. No transcurso da intervención localizaron trece envoltorios entre as súas pertenzas. “Durante as comprobacións, a persoa emprendeu a fuxida a pé e cruzou unha avenida entre vehículos en circulación, xerando unha situación de risco. Os policías seguírona sen perdela de vista e déronlle alcance, procedendo á súa detención. Posteriormente foron localizados outros 24 envoltorios”, explican dende o Concello.
O detido era trasladado a dependencias da Policía Nacional, onde os axentes da Policía Local compareceron para dar conta dos feitos e fixeron entrega dos efectos intervidos.
Fontes do Concello destacan “o labor de vixilancia e a capacidade de resposta da Policía Local, e agradecen a colaboración da Policía Nacional na recepción do detido e a tramitación das dilixencias”.