A Policía Nacional vén de desarticular un grupo criminal dedicado ao tráfico de substancias estupefacientes na cidade de Ourense. No operativo, coordinado polo Grupo de Estupefacientes desta Comisaría, interviñeron GOES e UPR, e saldouse coa detención de cinco persoas (catro homes e unha muller) e coa intervención de varios tipos de substancia estupefacientes, diñeiro en metálico e outros efectos, entre os que destacan varios vehículos propiedade dos detidos.
“A operación denominada “Al Andalus” é o froito dunha complexa investigación desenvolvida durante meses por parte do Grupo de Estupefacientes desta Comisaría Provincial. Púxose o punto final á mesma durante a madrugada do pasado día 11 de abril coa detención de cinco persoas sobre as cales se puideron determinar a súa presunta implicación no tráfico de estupefacientes. De forma simultánea levaron a cabo tres rexistros domiciliarios en barrios de Couto, Ponte e Barrocás”, tal e como informa a Policía Nacional.
No citado dispositivo colaboraron varios grupos de operacións especiais de seguridade (GOES), así como unidade de prevención e reacción (UPR) da Comisaría de Ourense, e intervíronse 14 quilogramos de haxix, ademais doutras drogas e substancias ilegais, uns 20.000 € en metálico, tres automóbiles, unha motocicleta de gran cilindrada e outros efectos relacionados co tráfico de drogas, segundo os datos feitos públicos pola Policía Nacional.
Os detidos pasaron ao dispor do Xulgado de Instrución número 1 de Ourense que ordenou o ingreso en prisión dun dos investigados e a posta en liberdade con cargos dos outros catro.
“Como en operacións antidroga efectuadas con anterioridade en Ourense, a detención dos presuntos autores supón a desarticulación dun importante punto negro de abastecemento e distribución desta substancia na capital ourensá”, conclúen dende a Policía Nacional.
