Nunha nova operación contra o tráfico de drogas en Ourense, a Policía Nacional vén de proceder ao desmantelamento dun punto de distribución e venda de drogas. O pasado 20 de febreiro, axentes de Policía Nacional, integrantes do Grupo de Estupefacientes da Brigada Provincial de Policía Xudicial da Comisaría de Ourense, levaron a cabo a detención de seis persoas como presuntas autoras dun delito contra a saúde pública. Culminan así varios meses de investigación, orientados a conseguir a desarticulación dun importante centro de distribución de substancias estupefacientes en Ourense, na que se denominou “Operación Calamar”.
“Tras numerosas dilixencias policiais de investigación, púidose establecer que os detidos utilizaban un garaxe situado no barrio de O Vinteún, para adquirir notorias cantidades de substancias estupefacientes, almacenalas e posteriormente destinalas ao tráfico para o consumidor final das devanditas substancias”, din dende a Policía Nacional.
Como culminación á operación policial, practicáronse tres rexistros. Un deles nun garaxe situado no Barrio de O Vinteún, utilizado como “gardería” para o almacenamento da droga; tamén nunha furgoneta e nun piso situado no barrio de Covadonga.
O resultado final da operación tradúcese na incautación de diversas cantidades de substancias estupefacientes destacando os 161 gramos de cocaína, heroína, substancias para o corte e diversos utensilios destinados para o tráfico de drogas, como envasadoras sen carga, básculas de precisión e máis de 3.500 euros en diñeiro en metálico. Ademais os axentes procederon á intervención de tres vehículos de alta gama.
Tras realizar as dilixencias oportunas, os detidos foron postos ao dispor da Sección de Instrución do Tribunal de Instancia en funcións de garda.