Case un mes despois de que o Concello do Barco anunciase (o 9 de xuño) que quedaba prohibido o baño na praia fluvial do Malecón por mor dunha avaría no colector do río Cigüeño, as augas do río Sil neste punto xa volven estar aptas para o baño.
Comunicábao o alcalde do Barco, Aurentino Alonso, na sesión plenaria de xullo que a Corporación municipal celebraba na tarde deste 2 de xullo, tras coñecer o resultado das analíticas realizadas pola Consellería de Sanidade. “Acabo de recibir unha mensaxe de Sanidade na que se nos informa de que as augas do río Sil están en condicións aptas”, indicando ademais que iso permitirá que as persoas que nesta fin de semana acodan ao SilFest poderán desfrutar do río.
Segundo lembra o Concello, pasado día 9 de xuño, unha avaría detectada no colector de saneamento situado no tramo soterrado do río Cigüeño, obrigaba a prohibir o baño ata novo aviso. Debido a que a súa desembocadura está situada á altura da praia fluvial do Malecón do Barco, prohibíase o baño ata ter a garantía do correcto funcionamento do colector.
O pasado 29 de xuño, comunicábase á Consellería a reparación da avaría na rede de saneamento e ese mesmo día os técnicos recollían mostras da auga. Sanidade conclúe que, ao cumprirse as condicións esixidas
polo Servizo de Control de Riscos Ambientais, o Concello do Barco pode proceder a retirar os carteis de prohibición de baño na zona do río Sil.