O conselleiro de Sanidade en funcións, Julio García Comesaña, asinaba está mañá en Ourense un convenio de colaboración entre o Sergas e a asociación ourensá “As Burgas”, no marco dos programas de intervención e asistencia sanitaria a persoas con trastornos aditivos. O Servizo Galego de Saúde achegará unha partida económica de 221.529 euros para o financiamento das actividades que realiza esta asociación.
O responsable da Sanidade galega e o presidente da Asociación “As Burgas”, Gerardo Flórez Menéndez; firmaron un acordo que contribuirá, entre outros, ao financiamento dun programa destinado á prevención de recaídas de pacientes previamente estabilizados, ou ao desenvolvemento do programa “Conta Contigo”, destinado a persoas que estiveron recluídas e en proceso de reincorporación social.
O acto contou tamén coa presencia do xerente da Área sanitaria de Ourense Verín e o Barco de Valdeorras, Félix Rubial. Durante o ano 2023, un total de 333 persoas usuarias foron asistidas ao abeiro deste convenio. En concreto, 228 homes e 105 mulleres.
A Xunta de Galicia vén de asinar un total de 9 convenios de colaboración entre o Sergas e outras tantas entidades sen ánimo de lucro para a asistencia a pacientes con trastornos relacionados con substancias e outros trastornos adictivos, até acadar os 7.764.100 euros.
Deste xeito, o executivo galego incrementará este ano en máis de medio millón de euros o investimento dos convenios que o Servizo Galego de Saúde mantén para o desenvolvemento de programas de asistencia sanitaria especializada desde un enfoque biopsicosocial.
Na actualidade, as adiccións son consideradas unha enfermidade que require dun tratamento multidisciplinar e personalizado. Así, ante calquera problema relacionado coas mesmas, aconséllase acudir a un centro de tratamento específico directamente, ou ben, solicitar axuda aos profesionais de atención primaria, para que poidan avaliar cada un dos casos, e derivaralos aos centros que procedan.
