Os amantes do ciclismo de montaña xa poden marcar no calendario o próximo 19 de setembro de 2026, data na que se celebrará unha nova edición da Quiroga Bike Marathon, unha das probas de MTB de referencia no sur da provincia de Lugo. A organización abriu oficialmente o período de inscricións para unha proba que volverá reunir a centos de participantes na contorna do Xeoparque Montañas do Courel, combinando deporte e natureza nun percorrido deseñado para desfrutar do mountain bike en estado puro.
A edición 2026 contará novamente con dúas distancias adaptadas a diferentes niveis de preparación e experiencia:
- Bike Marathon: 45 quilómetros e 1300 metros de desnivel positivo.
- Bike Extreme: 65 quilómetros e 2300 metros de desnivel positivo.
Ambos os percorridos atravesarán algúns dos carreiros e paisaxes máis representativas do Concello de Quiroga, incluíndo tramos técnicos, descensos e zonas rápidas que permitirán aos participantes desfrutar dunha experiencia completa de MTB. A proba poderá disputarse tanto de forma individual como por parellas e non será necesario dispoñer de licenza federativa para participar. Ademais, todos os rexistrados contarán con diferentes servizos incluídos na inscrición, como bolsa do corredor, seguro deportivo e cronometraxe con chip.
Con esta nova edición, Quiroga volverá consolidarse como un dos principais escenarios do MTB galego, acollendo unha xornada deportiva nunha contorna natural de gran valor paisaxístico. As inscricións xa están dispoñibles a través da páxina web oficial do evento: www.quirogabikemarathon.com
