Dende este xoves 27 de novembro estará aberto o prazo para a inscrición dos nenos e nenas que desexen participar no Campamento de Nadal do Barco de Valdeorras, que neste 2025 se celebra baixo o lema “Un barco cheo de apertas verdes”.
Dirixido a nenos e nenas de entre 3 e 12 anos, o campamento terá lugar entre os días 22 de decembro de 2025 e o 5 de xaneiro de 2026 con actividades que se desenvolverán entre as 10 e as 13 horas. Ademais tamén haberá servizo de agarda de 9 a 10 e de 13 a 14 horas. Todas terán lugar no edificio da biblioteca, cun máximo de 50 inscritos.
A data límite de inscrición é o 15 de decembro, e as prazas adxudicaranse por rigorosa orde de entrega. A recollida e entrega das follas de inscrición pode facerse tanto na Biblioteca Pública como na Librería Praxis. O prezo da actividade estableceuse en 55 euros por inscrito, e o servizo de agarda custa 15 euros por cada franxa horaria.
No programa de actos que se desenvolverá no campamento hai actividades de convivencia, obradoiros, contos, música, natureza e moitos xogos para todas a idades.