O Ministerio de Transportes e Mobilidade Sostible vai comezar os traballos de reparación e estabilización dos noiros de desmonte na estrada N-525, á altura do quilómetro 236,6, en ambas as marxes, no termo municipal de Ourense. Unhas actuacións enmarcadas nas obras de emerxencia aprobadas polo Consello de Ministras e Ministros tras o paso de sucesivas borrascas cunha intensidade excepcional durante 2026.
As actuacións proxectadas consisten no despexe de restos de vexetación arbustiva e talla de árbores, escavacións nas superficies dos noiros para dotalos de maior inclinación e estabilidade, protección de superficies mediante formigón proxectado, execución de bulones pasivos de suxeición e a protección da calzada fronte a desprendementos mediante a instalación mallas de triplo torsión.
Debido a iso, desde hoxe martes 13 de outubro e durante un período aproximado de dous meses, produciranse modificacións na circulación e restricións temporais na contorna da localización do noiro.
Para facilitar a circulación e evitar as zonas afectadas mentres duren as obras, recoméndase aos condutores empregar como itinerario alternativo o tramo da autovía A-52 entre as ligazóns Ourense Centro (quilómetro 228 da A-52) e Ourense Sur (quilómetro 224 da A-52).