A Festa Coveira de Arcos (Vilamartín de Valdeorras), que conxuga gastronomía con celebración e etnografía, o vindeiro 12 de xullo a súa novena edición. A festa comezará a partir das 20h. e as súas entradas terán un prezo de 18 euros na venda anticipada (en Cafetería Makoki, A Horta de Fina e Mar e Bar Chevalier no Barco) e de 20 euros o mesmo 12 de xullo en taquilla.
Coa entrada, cada participante recibirá unha cunca conmemorativa coa que poderá percorrer estas fermosas construcións soterradas, pero tamén degustar brancos e tintos e unha gran variedade de petiscos e doces. Non faltará tampouco a tradicional pancetada.
A ruta tamén está aberta ao público infantil e para el haberá refrescos. O evento terá un aforo limitado a 1.000 persoas. A música é outro ingrediente esencial e, desta volta, contarase con Charanga Mekánika, Os Parrandas e Dj Isra. A continuación, farase a procesión de Don Godellín.
O remate da celebración será tamén musical e virá da man de Dj Tariro na praza da festa.
Esta Festa Coveira estará organizada pola Asociación de Coveiros de Arcos coa colaboración do Concello de Vilamartín.
