O alcalde de Ourense, Gonzalo Pérez Jácome, recibía na mañá deste xoves 29 de outubro no salón de plenos aos membros da Policía Local e do corpo de Bombeiros de Ourense para recoñecer os seus logros deportivos nos XI Xogos Europeos de Policía e Bombeiros celebrados recentemente.
Na disciplina de atletismo, o policía local José Antonio Fernández Rodríguez fíxose coas medallas de prata nas probas de 100 e 200 metros lisos, alén dun bronce en salto de lonxitude, mentres que o seu compañeiro Germán Quiroga Álvarez conquistou a medalla de ouro nos 5 quilómetros marcha.
En ciclismo en ruta, Lorenzo Ferreiro Núñez colgouse a medalla de bronce e Sabela Ferreiro Iglesias alzouse coa medalla de ouro nas súas respectivas categorías.
Por parte do corpo de Bombeiros, Rubén González Costas cultivou un total de tres ouros e unha prata. O ourensán logrou o ouro individual na modalidade de Ultimate Firefighter —competición que combina catro probas específicas de habilidades, forza e resistencia de bombeiros—, o ouro na Stair Race individual e outro ouro na Stair Race por parellas, sumando finalmente unha prata na Stair Race con EPI completo.
Un éxito que o rexedor vinculou directamente coa excelente preparación física, a disciplina e a profesionalidade que demostran na súa desempeño diario ao servizo da cidadanía.