Carla Lourdes, unha das voces emerxentes con máis proxección do panorama pop español, actuará este venres 1 de agosto no Barco de Valdeorras como parte do Ciclo Terrasón (que está incluído nos Concertos do Xacobeo), na Praza Maior da vila. Cunha proposta que combina sensibilidade lírica e sonoridades contemporáneas, a nova cantautora continúa así a xira de presentación do seu primeiro traballo discográfico, “El Día que Descubrí el Lunar de Tu Oreja”, publicado o pasado mes de abril baixo o selo Esmerarte. O álbum, que recibiu unha cálida acollida por parte do público e a crítica, xa a levou a compartir escenario en festivais como PortAmérica ou Río Verbena Fest.
O estilo musical do disco móvese entre o pop electrónico e o indie español, con melodías pegadizas, estruturas bailables e unha voz doce que destaca en rexistros agudos. A produción combina frescura e emoción, acompañando letras íntimas que exploran o amor, a amizade, o equilibrio emocional e o reencontro cun mesmo.
Cun estilo sinxelo e honesto, a cantautora ten ido atopando o seu lugar entre o público, especialmente entre quen se recoñece nas súas letras e na proximidade da súa proposta. Sen facer ruído, o seu nome empeza a ser habitual en escenarios galegos e a soar cada vez máis aló da súa contorna próxima.
Sobre Carla Lourdes
Carla Lourdes é unha cantautora natural de Ponferrada, e residente en Vigo, que logrou consolidarse como unha das voces emerxentes máis prometedoras do pop español. O seu talento e sensibilidade comezaron a brillar aos 15 anos, cando empezou a compoñer as súas primeiras cancións. Con todo, non foi ata os 24 cando decidiu compartir a súa música co mundo.
En xuño de 2021, Carla debutou con «Sen Instrucións», un sinxelo que marcou a súa entrada na escena musical e captou a atención do público e a crítica. Un ano despois, en 2022, lanzou o seu primeiro EP autoeditado, O querer das flores, unha obra coa que mostrou o seu talento para fusionar un pop delicado con matices de indie español. A recepción foi tan positiva que a levou a embarcarse nunha xira de máis de 20 concertos por toda a península nese mesmo ano, sumando outras 17 datas adicionais en 2023.
O estilo de Carla Lourdes caracterízase por un son fresco, retrousos pegadizos e letras introspectivas que funcionan como un espello no que todos podemos vernos reflectidos. A través das súas cancións, disecciona as emocións máis íntimas: aquilo que nos doe, preocúpanos ou non podemos expresar facilmente. A súa música evoca a esencia de artistas como Yoly Saa, Elsa e Elmar, Natalia Lacunza, Zahara ou Ximena Sariñana, pero mantén sempre unha personalidade única que a diferenza.