O próximo día 15 de maio a Asociación De Nai a Nai organizará unha charla sobre extracción e conservación do leite materno. Estará impartida por Antía Fernández Gómez e terá lugar no local da entidade, no edificio da biblioteca pública do Barco, no 4º piso, ás 17:30h.
Nesta sesión a relatora aportará as claves para realizar unha extracción de leite de maneira óptima. “Ela é nai dunha nena e un neno, asesora de lactación e enfermeira en obstetricia. Falará sobre como realizar a extracción manual e sobre que cuestións debemos de ter en conta á hora de utilizar un sacaleites. Cantos días podemos manter o leite na neveira, ou como desconxelala, son cuestións que se repiten habitualmente ao falar deste tema. Tras finalizar a charla, haberá un coloquio onde outras nais compartirán a súa propia experiencia co fin de axudar ás mulleres que acudan en busca de información e ideas, para poder continuar aleitando durante a volta ao traballo, ou en calquera outra circunstancia pola que necesiten extraerse leite”, explica a presidenta de De Nai a Nai, Lorena Prada.
Así mesmo comentarase que existen diferentes situacións polas que unha nai decide extraerse leite, “poida que o seu bebé necesite ser suplementado por baixo peso ou por dificultades na succión, ou que a nai teña que ausentarse por calquera motivo. Sexa o caso que sexa, a nai vai necesitar apoio, e un bo manexo da extracción manual ou mediante sacaleites. Nesta charla poderá resolver todas as súas dúbidas sobre este tema ou calquera outro relacionado coa lactación”, indica Lorena Prada.
