Nesta semana comezaban os traballos asociados á subvención de 30.000 euros que o Concello de Vilar de Barrio conseguiu por parte da Axencia de Turismo da Xunta de Galicia destinada a continuar coa posta en valor do xacemento arqueolóxico de O Castelo de San Xoán de Bara. Esta axuda “supón un importante respaldo ao traballo que o consistorio vén desenvolvendo nos últimos anos para preservar e divulgar este enclave único, con máis de 16 hectáreas de extensión e vestixios que abarcan desde a Idade do Bronce ata a Idade Media, pasando pola Romanización”, indican dende o Concello.
Grazas a esta nova achega, “poderase continuar coas tarefas de recuperación do sector coñecido como Burato dous Mouros, un espazo cunha grande carga simbólica para a comunidade local e clave na interpretación histórica do xacemento”, indican dende o Concello de Vilar de Barrio, explicando que esta actuación súmase a outras xa realizadas en anualidades anteriores, como “a musealización de varias zonas mediante paneis ilustrativos de alta calidade realizados polo artista Miguel Robledo, así como a creación dun roteiro de sendeirismo de baixa intensidade, sinalizado e especialmente deseñado para o goce de familias”.
O obxectivo do Concello de Vilar de Barrio é seguir avanzando na investigación arqueolóxica e na habilitación do xacemento como un espazo cultural e turístico de referencia, aberto tanto á cidadanía como aos visitantes. “Esta estratexia non só permite conservar un patrimonio excepcional, senón que tamén contribúe a dinamizar a economía local mediante un modelo sostible de desenvolvemento rural ligado ao coñecemento e a posta en valor do territorio”, aseguran.