Con follas de reclamacións nas mans, un numeroso grupo de pais e mais concentrábase ás nove e media desta mañá diante do Centro de Saúde do Barco para manifestar o seu malestar pola situación da atención pediátrica neste municipio. “Hai un único pediatra para atender a uns 2.000 nenos e isto non pode ser, entón dende aquí pedimos á xerencia da Área Sanitaria de Ourense, Verín e O Barco que solucione a situación, que poñan os medios oportunos. Sabemos que é verdade que había un pediatra que se ía incorporar, pero agora dinnos que é moi complicado que se incorpore. A finais deste ano probablemente o pediatra que temos xubilarase e o futuro é moi negativo, entón pedimos axuda a quen corresponda”, comentaba como voceira deste colectivo Sandra Méndez Real.
Previamente a esta concentración, en concreto o mércores 20 de marzo, remitíaselle dende este colectivo por correo electrónico unha carta ao xerente da Área Sanitaria de Ourense, Verín e O Barco, expoñéndolle a situación da Pediatría no Barco de Valdeorras.
Este colectivo apunta que hai “uns anos a situación era ben distinta no Barco. Contabamos con tres pediatras que ofrecían atención de mañá e tarde, algo moi importante tendo en conta que en moitos casos os pais traballamos de mañá e cabía a posibilidade de non perder o día para levar aos nenos ao médico. De tres pasamos a un e pode que pronto pasemos a ningún”.
Neste senso, a carta conclúe sinalando que “os pais e nais do Barco pedísmolle unha resposta clara de cal é o presente e cal vai ser o futuro da atención pediátrica para os nosos fillos e fillas. Entendemos que non faltará intención de solucionar este problema pero pedimos que se axilicen os procesos necesarios para a cobertura dalgunha das dúas prazas vacantes antes de que algún paciente sufra as consecuencias dunha atención sanitaria precaria”.
