Con motivo das peregrinacións ao Santuario da Nosa Señora dos Milagros (Baños de Molgas), a Xefatura de Tráfico de Ourense informa de que o venres 1 de setembro vaise instalar desde as 21:00 horas da noite ata as 02:00 horas xa na madrugada do sábado día 2, unha carpa para atención aos peregrinos.
Esta carpa estará situada nunha marxe da estrada autonómica OU-101 (Ourense-Maceda) á altura de As Campinas (Paderne de Allariz), punto quilométrico 9.1 da citada vía e lugar de maior paso de peregrinos dirección ao santuario.
Na carpa de Protección Civil estarán presentes persoal de Tráfico (patrulla, capitán e sefe provincial) e Protección Civil (responsable provincial e voluntarios de Baños de Molgas e Pereiro de Aguiar), Cruz Vermella e disporase de diferente material de axuda (caixa de primeiros auxilios sanitaria, pezas reflectoras…) para efectuar a peregrinación coa máxima seguridade posible para todos os cidadáns que a pé ou en bicicleta circulen sentido Os Milagros.
Así mesmo, reforzarase a vixilancia e asistencia nas rutas habituais de chegada ao santuario por parte de diferentes patrullas da Garda Civil de Tráfico.
