
O subdelegado do Goberno en Ourense, Eladio Santos, supervisou este luns a organización loxística do 29N que distribúe 4.072.895 papeletas e 1.046 urnas. O subdelegado achegouse ao garaxe da Subdelegación do Goberno, desde o que persoal desta Administración prepara o reparto do material electoral aos 92 concellos da provincia de Ourense e aos organismos implicados no proceso electoral.
Durante estes días, o persoal da Administración que traballa neste dispositivo distribúe as 3.679.981 papeletas que se imprimiron para o Congreso e as 392.914 para o Senado, e que se repartirán entre as 523 mesas repartidas polos 391 locais electorais de toda a provincia. En total haberá dispoñibles 1.046 urnas e 389 cabinas para elixir as papeletas.
As mesas estarán atendidas por 1.569 membros titulares e por 402 representantes da Administración que se encargarán de verificar a correcta apertura de mesas, resolver incidencias e recoller os datos do reconto de voto. Para poder realizar este labor, a Subdelegación realizou xornadas de formación para ditos representantes, celebradas entre o 12 e o 16 de novembro en Ourense, Celanova, Xinzo de Limia, Verín e O Barco de Valdeorras.

Ademais, a Subdelegación coordina a actuación das Forzas e Corpos de Seguridade para que a xornada transcorra con normalidade cun total de 1.217 axentes da Garda Civil, Policía Nacional e Policía Local.
Ao longo da xornada electoral, un equipo de incidencias, composto por funcionarios da Subdelegación, ocúpase desde as 8.00 horas e ata o peche de tódalas mesas da provincia, de solucionar calquera imprevisto técnico ou material que xurda nos colexios electorais, manténdose continuo contacto telefónico cos representantes, concellos e xuntas electorais.
Eladio Santos agradeceu a implicación e colaboración do persoal da Administración para facilitar que o proceso electoral funcione á perfección e garantir así a cita coas urnas.