OurenseÚltima hora

Estudantes do colexio Divina Pastora do Barco entre os máis de 800 que participan no Concurso da Constitución da Subdelegación do Goberno en Ourense

O xurado cualificador do traballos presentados reuniuse para escoller aos 20 gañadores, que recibirán o seu premio nun acto institucional que se celebrará no Auditorio Municipal de Ourense o 6 de decembro

 

O xurado da 42ª edición do Concurso da Constitución da Subdelegación do Goberno en Ourense reuniuse para escoller os 20 traballos gañadores de entre os 873 recibidos. Este certame escolar conmemora este ano o 48 aniversario da Carta Magna e o xurado valorou a orixinalidade e creatividade dos traballos, así como a súa calidade artística e adecuación á temática.

Aberto ao alumado de todos os niveis educativos, nesta ocasión os traballos debían versar sobre o artigo 49:
“1. As persoas con discapacidade exercen os dereitos previstos neste título en condicións de liberdade e igualdade reais e efectivas. Regularase por lei a protección especial que sexa necesaria para o dito exercicio.
2. Os poderes públicos impulsarán as políticas que garantan a autonomía persoal e a inclusión plena na sociedade das persoas con discapacidade, en contornas universalmente accesibles. Así mesmo, fomentarán a participación das súas organizacións, nos termos que estableza a lei. Atenderanse particularmente as necesidades específicas das mulleres e dos menores con discapacidade.”

En concreto, a Subdelegación do Goberno recibiu 666 traballos en formato debuxo da categoría de educación infantil, primaria e educación especial; mentres que na modalidade na que concorren os estudantes de ESO, bacharelato, formación profesional e universitarios presentáronse 188 fotografías e 19 vídeos.

 

 

Na primeira categoría participaron rapaces e rapazas de 13 centros educativos públicos e privados da provincia (CEIP Plurilingüe Santo Ángel, CPR Plurilingüe Divina Pastora do Barco de Valdeorras, CEIP Manuel Luis Acuña, CEIP Profesor Albino Núñez, CEIP Plurilingüe Irmáns Villar, CPR Padre Feijoo Zorelle, CPR Plurilingüe La Purísima, CEIP Plurilingüe Os Blancos, CEIP Carlos Casares de Xinzo de Limia, CPR Mª Inmaculada de Verín, CEIP Plurilingüe Amadeo Rodríguez Barroso, CRA Amencer de Ribadavia, e CPR Plurilingüe Miraflores do Pereiro de Aguiar).

Na modalidade de fotografía e vídeo participaron alumnos e alumnas de 7 centros educativos (CPR Plurilingüe Divina Pastora MM Franciscanas de Ourense, CPR Plurilingüe Padre Feijoo-Zorelle, CPR María Inmaculada de Verín, CPR Malvedo de Coles, CPR Plurilingüe Santo Ángel Ourense, CPR Plurilingüe Divina Pastora do Barco e CPR Plurilingüe Santa María Maristas).

O xurado está presidido polo subdelegado do Goberno, Eladio Santos, e formado polo secretario xeral da Subdelegación, Manuel Arias; a directora do Museo Municipal de Ourense, Eva Torres; o inspector de Educación Xosé Fernández; o profesor da EASD Antonio Faílde, Nilo Héctor Arias; a deputada provincial Eva Pérez Gamote, en representación do PSOE, e o senador José Manuel Baltar, en representación do PP provincial.

Entrega de premios

A gala de entrega de premios aos gañadores (10 de cada categoría) será o vindeiro día 6 de decembro, ás 12 horas, no Auditorio Municipal de Ourense, coa participación dos concursantes, premiados, responsables institucionais e familias para conmemorar o Día da Constitución.

Back to top button