Na tarde deste mércores 23 de setembro unha menor era evacuada en helicóptero medicalizado tras ser atropelada na cidade de Ourense, tal como indican dende o 112 Galicia, explicando que a cativa “foi conducida ao Hospital de Ourense tras o accidente que se produciu preto das sete no Camiño da Seara”, zona próxima á Facultade de Dereito. “Un vehículo alcanzou á pequena, que quedou tendida na vía”, segundo explicaron as persoas que chamaron ao 112 Galicia para alertar.
Deseguido, o persoal do Centro Integrado de Atención ás Emerxencias de Galicia informaba aos profesionais de Urxencias Sanitarias de Galicia-061, que xa tiñan coñecemento do suceso e estaban a preparar o despegue do helicóptero medicalizado con base en Ourense co obxectivo de “realizar un traslado rápido ao hospital da cidade”.
Ao lugar dos feitos acudía tamén unha patrulla da Policía Local.