Un grupo de alumnos de terceiro curso do Grao en Enxeñería de Obras Públicas da Universidade da Coruña, no marco da materia Enxeñería do Terreo, visitaba o 8 de abril Valdeorras co obxectivo de coñecer de primeira man, e sobre o terreo, o funcionamento e as características do sector da lousa.
Durante a súa visita, os estudantes estiveron acompañados pola profesora da Escola Técnica Superior de Enxeñería de Camiños, Canles e Portos da UDC, María José Mijares, quen foi subdirectora xeral de Recursos Minerais da Xunta de Galicia. A docente destacou a relevancia este tipo de iniciativas para achegar a realidade industrial ao ámbito académico.
A visita principiaba en Sobradelo (Carballeda de Valdeorras), na sede do Clúster da Pizarra de Galicia, onde eran recibidos polo seu presidente, Eliseo López. Durante o encontro, López ofreceu ao alumnado unha presentación técnica na que puxo en valor as principais características da lousa galega, o seu proceso de formación, así como as súas aplicacións construtivas e a súa relevancia nos mercados internacionais.
Posteriormente, o grupo desprazouse ata o núcleo de O Trigal, tamén no municipio de Carballeda de Valdeorras, para ver unha nave de elaboración do grupo CUPA, podendo observar de cerca os procesos de selección do material e transformación. A xornada completouse cunha visita á canteira ao ceo aberto Oportuna, de Pizarras Vazfer, situada en Casaio. Alí, os visitantes coñecían as técnicas de extracción e as condicións do xacemento.
“Desde o Clúster da Pizarra de Galicia valoramos moi positivamente visitas como a recibida hoxe, xa que contribúen á formación dos futuros profesionais que desenvolverán a súa actividade no ámbito da obra pública”, sinalaba Eliseo López.
“Estes encontros reforzan o vínculo entre o sector produtivo e o ámbito universitario e axúdannos a poñer en valor a relevancia estratéxica da lousa galega como recurso natural, elemento construtivo de primeira orde e motor económico do territorio”, concluíu o presidente do clúster.
Fotos cedidas.
