A ourensá Tamara Feijoo, licenciada en Belas Artes, inaugura mañá venres, día 10, unha exposición das súas últimas obras na galería de arte Marisa Marimón. O acto terá lugar a partires das 20h. A mostra recolle traballos de debuxo e pintura que se caracterizan por detalles íntimos e por estar plasmados en pequenos formatos e soportes delicados. En canto á temática, a súa práctica artística xira arredor da relación do ser humano e a natureza.
A serie que poderá visitarse na galería de arte Marisa Marimón, ‘A imaxe fantasma’, reúne traballos sobre papel. “As pegadas, os restos, a luz e, de novo, o espazo son os elementos que constitúen as obras; os gofrados que representan as pegadas de térmites sobre papel e madeira convértense en abstraccións e conviven con espellismos e papeis que se volveron transpartentes, fráxiles e etéreos”, define a propia autora.
Segundo ela, nas pezas que se exporán hai unha finalidade: debuxar por medio do volume, a impresión e a marca, debuxar con luces e sombras para falar da fugacidade e persistencia e, en definitiva de recordo.
A exposición poderá ser visitada até o 30 de setembro, aínda que no mes de xullo só estará aberta en horario de 11 a 14 h. Pola tarde pódese contemplar con cita previa. Do 1 de agosto ao 9 de setembro, a sala pecha por vacacións.