Na mañá deste mércores 21 de xaneiro, o subdelegado do Goberno en Ourense, Eladio Santos, supervisaba o dispositivo de seguridade composto pola Garda Civil, Policía Local, Bombeiros, Protección Civil e Cruz Vermella para garantir o normal desenvolvemento do Entroido de Xinzo de Limia, que comezará o vindeiro sábado, 24 de xaneiro co tradicional “Petardazo” e durará ata o 22 de febreiro.
Eladio Santos presidiu a Xunta Local de Seguridade ordinaria do Concello de Xinzo de Limia, na que tamén participaron o alcalde do municipio, Amador Díaz; a xefa da Unidade contra a Violencia sobre a Muller da Subdelegación do Goberno, Alida Iglesias, e representantes da Xunta, da Garda Civil e da Policía Local.
Tras o encontro, o subdelegado do Goberno animou a veciños, veciñas e visitantes a desfrutar dos días de festexos “con responsabilidade e cumprindo as normas” para non lamentar danos. “O dispositivo está preparado cun importante reforzo de persoal para garantir o correcto desenvolvemento da programación, pero pedimos, como sempre, a colaboración cidadá”, expresou.
Un dos temas tratados foi o control de aforo que se levará a cabo o vindeiro sábado, 24 de xaneiro, nos puntos de acceso á Praza Carlos Casares a partir das 21:00 horas, co obxectivo de previr riscos e protexer aos asistentes. Ademais, prohibirase o acceso con obxectos de vidro como botellas ou vasos.