Os cogomelos serán os protagonistas nas trece propostas culinarias coas que participarán outros tantos establecementos de hostalaría triveses no I Concurso Tapa Micolóxica. Trátase dunha iniciativa promovida dende o Club Montaña Trives que se desenvolverá do 30 de outubro ao 1 de novembro. Estas tapas poderán ser degustadas (a un prezo de 1,50 euros) e valoradas polo público, que emitirá a súa opinión a través das papeletas das que disporán os locais participantes, e que para ser válidas deberán contar co selo do establecemento.
“O xurado popular elixirá a mellor tapa presentada, deixando a mesma reflexada na papeleta. Os tres máis votados serán os ganadores do concurso” e recibirán unha placa acreditativa, tal e como se indica nas bases do certame. Os establecementos que participarán nel son San Martín, O Cafeto, Quintela, O Pilón, La Viuda, Toral, Cantina do Catro, Boliche, Manolos, Sky, O Bodegón, Ardora e Casanova.
O reconto de votos farase o domingo 1 de novembro ás 16h. na Oficina de Turismo da praza do Reloxo. Ademais os participantes neste percorrido de tapas micolóxicas que teñan selado a súa papeleta en alomenos catro locais terán opción a participar nun sorteo de agasallos. Farase o mesmo día 1 de novembro ás 17h. Entre os agasallos do sorteo haberá un libro de micoloxía, un estuche de viño “Chao do Couso”, unha tarta de castañas e unha cea para dúas persoas na “Cantina do Catro”.