Neste sábado poñíase en marcha o apartado competitivo do X Trail Quiroga Challenge, que se desenvolve polo territorio do Xeoparque Montañas do Courel. O programa comezaba de madrugada coa entrega de dorsais na modalidade ultra (entre as 5:15h. e as 5:45h.) e continuaba, despois coas do resto de probas. Xa a partir das 6h. iniciábanse as saídas, que se abrían coa dos participantes no ultra e seguían despois cos de maratón, trail, minitrail e andaina.
O Quiroga Trail Challenge ten dúas partes, o Trail do Castelo que se desenvolvía este sábado con cinco distancias: a ultra de 82 km tras os recortes, a ultra de 70 km, a maratón de 42 km, o trail de 29 km e o minitrail de 17 km; e o Trail do Lor, xa o domingo 25 de febreiro, con dúas distancias: o trail de 29 km e o minitrail de 16 km.
A organización da proba xa decidiu recortar as zonas máis expostas en altura de ambas as distancias a principios desta semana, en vista das previsións meteorolóxicas, buscando alternativas máis seguras para corredores e voluntarios. Igualmente acordaron esixir material obrigatorio máis acorde ás novas condicións climatolóxicas, sempre pensando na seguridade dos participantes.
“Na madrugada de hoxe arrincaron ambas as probas á hora prevista, con voluntarios apertura asegurando o correcto balizaje dos percorridos. Ao mesmo tempo, dous expertos corredores de alta montaña comprobaron a viabilidade das zonas máis altas e comunicaron ao director da proba o estado e cota da neve caída. Ante esta nova situación, a organización decidiu de inmediato neutralizar parte dos percorridos de ambas as distancias e desvialos cara ao percorrido da maratón para evitar as zonas máis altas e perigosas, posto que o acceso en vehículo resultaba igualmente complicado”, segundo informa a organización. O resto das distancias: maratón, trail, minitrail e andaina transcorreron sen alteracións.
Os podios
Con máis esforzo do habitual así se completaron os podios. Na ultra de 90 kms, o podio masculino foi para Miguel Portal Losada, do Club 21 Leguas Narón, en primeiro posto; o segundo caixón foi para José Manuel Gil Bernárdez, do AC Castelos Trail Club; e, o terceiro posto completouno Victor Maneiro Freire, do Club de Montaña Vértice.
O podio feminino formárono nesta orde, Vanessa Pérez Castelao, de Terras de Burón; Loreto Rodríguez Martínez, do Atletismo Baiona; e Lea Doppelbauer, como Independente.
Na ultra de 70 completaron a clasificación masculina Pablo Villa González (Adidas Terrex), Pablo Vecino Rey (Tribu Trail) e José Santiago Villar (Os Corzos do Ortegal). En mulleres compartiron caixón Cristina Rodríguez Villar (Running Sport Trail), Belén Rodríguez #Vidal (Spain Smiles Team) e Eugenia Gil Ballester (Chotacabras).
O podio masculino da maratón para Roberto García González (Tribu Trail), Anxo Cid Corbillón (Independente) e Marcos Antonio Pascual Fidalgo (Castro- Trail) . Ao podio feminino subíronse Angels LLobera (INOV8), Patricia Noya (Tribu Trail) e Susana Fernández López (Wolves Born to Run).
A clasificación do trail masculino foi para Miguel Vázquez Grela (Traileros Toxos & Birras), Marcos Naya Badallo (Traileros Toxos & Birras), Alexandre Otero Iglesias (CDM Vértice). As tres mulleres clasificadas foron: Anna Mengual Ripoll (CD Senen Challenge), Uxía Fernández García (Condado Trail) e Isabel Reimúndez Suárez (Club Atletismo Sada).
Por último, o podio masculino do Minitrail formárono Eloy Martínez Faro (AC Castelos Trail Club, Promesa), Iñaki González Arias (Amurrio Trail) e Eduardo Saavedra Lagares (A.D. Náutico de Narón). O caixón feminino compartírono Rosa Maria Araújo Losada (Running Sport Trail), Elena Rosell Aragón (Metas Imposibles Trail Team) e Alejandra Seoane Rial (Traileros Toxos & Birras).
A organización quere agradecer “profundamente a comprensión e o esforzo titánico que hoxe supuxo para todos, corredores e voluntarios, realizar as distintas probas e que, a pesar das inclemencias do tempo, non se sufriu ningún contratempo importante”, sinala.
P programa competitivo continuará mañá co trail e o minitrail polos territorios do Lor. Este evento deportivo reúne nesta edición a uns 1.200 participantes. No apartado das comunicación cóntase co apoio dos Radioaficionados de Trives e tamén coa colaboración das agrupacións de Protección Civil de Quiroga, A Rúa, Petín e O Barco.
Fotos e vídeos cedidos.
