Por vez primeira o ciclo “Cata a Arte”, que promove o CRDO Ribeiro por quinta edición consecutiva, dá o salto fóra da provincia de Ourense. Así este pasado venres 23 de novembro as adegas Alberte, Terra do Castelo, Val do Deva e Viña Costeira presentábanse no Castelo de Santa Cruz, en Oleiros (A Coruña) a través da primeira edición do “Tour Cata a Arte by D.O. Ribeiro”, nun evento organizado en colaboración co sumiller Luis Paadín.
Esta actividade especial no marco do ciclo tiña lugar con motivo da inauguración da exposición de arte da artista María Coira en Oleiros. No decurso deste acto, o coñecido escritor ourensán Xosé Luis Méndez Ferrín pronunciou unhas verbas moi sentidas sobre ela.
Durante o evento, as catro adegas ofreceron os seus viños aos preto de 250 amantes do viño e a cultura visitantes ao evento da man dos propios adegueiros. Ademais, para amenizar a velada, contouse coa actuación musical de Eduardo Coma (violín) e Francisco Rosa (guitarra) e dun tradicional magosto para acompañar os viños das catro adegas.
A entrada actividade foi de balde aínda que, no marco desta acción solicitouse un donativo dirixido á Asociación Mar de Fábula, destinada integramente á limpeza do mar, representada no acto polo seu socio fundador, Xosé Manuel Barros.