“Estamos nun momento único para emprender no comercio local con negocios consolidados que buscan quen lles dea continuidade”. Así de contundente se mostrou José María da Torre, consultor e experto en comercio de proximidade, nas xornadas de emprendemento para estudantes organizadas pola Asociación de Empresarios de Valdeorras esta semana na Rúa e O Barco.
Ás sesións, celebradas no Teatro Lauro Olmo do Barco e no Centro Cultural Avenida da Rúa, asistiron máis de douscentos alumnos e alumnas de todos os centros de secundaria da comarca en colaboración co Instituto Nacional de Ciberseguridade (INCIBE) e co apoio do Inorde a través do programa Valdeorras Sostible, que ten como obxectivo achegar aos mozos maiores de 14 anos os retos e oportunidades do comercio local, así como espertar o seu interese polo emprendemento e a sustentabilidade.
Sesións de contacontos nas librerías, asesoramento personalizado de estilo nas tendas de roupa ou tarifas planas para a renovación de electrodomésticos. Esas foron algunhas as ideas proporcionadas polo público xuvenil, que tamén puido coñecer de primeira man a experiencia de Carlos Terán, presidente de AEVA e comerciante de cuarta xeración con negocio na Rúa e O Barco. Terán explicou como foi o seu bisavó quen iniciou o negocio familiar a finais do século XIX como panadería e foi o impulso económico da chegada do ferrocarril o que animou ao seu pai para comezar a vender graneis e produtos para o campo. “O máis importante é estar atento aos cambios e ir respondendo as necesidades de consumo, mesmo adiantarse a elas”, asegurou.
O presidente de AEVA mostrouse moi satisfeito co desenvolvemento de ambas as sesións e agradeceu a participación dos centros educativos (IES Lauro Olmo, IES Martaguisela, Colexio Divina Pastora, Colexio Pablo VI-Fátima e IES Cosme López), e a colaboración dos Concellos da Rúa e O Barco de Valdeorras que cederon o uso dos espazos. Tamén destacou a “oportunidade de volver contar con José María da Torre, grazas ao convenio que o Club do Emprendemento ten co INCIBE dentro do marco do programa INCIBE Emprende financiado pola Unión Europea, a través do Plan de Recuperación, Transformación e Resiliencia, fondos Next Generation EU”.
Concurso de microrrelatos e taller de audiovisual
Estas sesións de emprendemento forman parte da segunda edición de Valdeorras Sostible, organizado co apoio do Inorde, que inclúe o concurso de microrrelatos “Sucedeu nun comercio”, que ten aberto o prazo de participación ata o 28 de outubro. Os tres mellores relatos repartiranse 600€ en vales agasallo.
O relato gañador será transformado nun anuncio comercial a través dun taller participativo de audiovisual para converter esa historia nun anuncio que será a base dunha nova campaña de promoción do comercio local. Celebrarase na Biblioteca Municipal Florencio Delgado Gurriarán do Barco as tardes do 4, 5 e 6 de novembro de 17 a 19 horas. É gratuíto, dirixido a maiores de 14 anos e ten un aforo máximo de dez persoas. Tanto a inscrición ao taller como as bases do concurso están dispoñibles na web de AEVA.