O Pazo dos Deportes Paco Paz acollía a presentación oficial da liga Nacional e Liga Iberdrola de Categorías Infantís de Karate, que reúne esta fin de semana a máis dun milleiro de mozos deportistas chegados de toda España. Durante a xornada deste sábado dispútase a liga Nacional Infantil, mentres que o domingo será a quenda da liga Iberdrola Infantil, centrada na promoción e o impulso do deporte feminino.
No acto de presentación participaron diversas autoridades que quixeron mostrar o seu apoio a este importante evento deportivo. Por parte do Concello de Ourense, interveu o Tenente de Alcalde e Concelleiro de Deportes, Aníbal Pereira; en representación da Deputación de Ourense, estivo presente Enrique Álvarez Fernández, asesor de Política Deportiva; e por parte da Xunta de Galicia, interveu Beatriz Fernández, directora territorial da Consellería de Presidencia, Xustiza e Deportes.
As tres institucións coincidiron en destacar a importancia do karate e do deporte como motor de turismo deportivo, así como o papel esencial do deporte basee na formación de valores e no desenvolvemento persoal dos máis novos. Tanto o Concello, como a Deputación e a Xunta remarcaron o seu compromiso coa celebración de grandes eventos deportivos na provincia e a súa disposición para seguir apoiando á Federación Galega e Española de Karate para que Galicia continúe sendo un referente na organización de competicións nacionais.
Tamén participaron na presentación o presidente da Federación Galega de Karate, Óscar Lafuente, e o presidente da Real Federación Española de Karate, Antonio Moreno Marqueño, quen destacou o valor deste tipo de competicións tanto para o desenvolvemento deportivo dos máis novos como para a proxección do turismo deportivo na comunidade galega.
Lafuente subliñou que este campionato “é xa o número 13 que organizamos en Galicia desde que asumín a presidencia en 2020, o que demostra o compromiso e a confianza que a Federación Española deposita na nosa terra”. Ademais, quixo poñer en valor a implicación dos clubs, as familias e as institucións, “que fan posible que o karate siga crecendo cada día máis”.
Pola súa banda, Antonio Moreno quixo agradecer ás institucións galegas “o seu apoio constante ao karate e ao deporte basee”, e resaltou a importancia de “seguir traballando conxuntamente para que eventos como este cheguen a todas as comunidades autónomas e contribúan a fomentar valores como o esforzo, a disciplina e o respecto entre os máis novos”.
As competicións reunirán a deportistas de entre 6 e 13 anos de idade, nas modalidades de kata, kumite e parakarate, convertendo a Ourense no epicentro nacional do karate infantil durante toda a fin de semana.