Despois de coñecerse a noticia do falecemento a primeira hora desta mañá do Papa Francisco, o bispo de Ourense, monseñor Leonardo Lemos, vén de emitir un comunicado, no que expresa o seu pesar. “Tras asistir con devoción á bendición “Urbi et orbi” de onte, Domingo de Pascua, sorprendeunos dolorosamente á primeira hora desta mañá a noticia do falecemento do Santo Padre. A persoa e o maxisterio do Papa Francisco iluminou, ao longo destes doce anos, o exercicio do meu ministerio pastoral e a vida de toda a igrexa diocesana, de cuxo pesar hoxe fágome eco. De maneira especial quixera destacar que foi o papa Francisco, no seu exhortación Evangelii gaudium, o que suscitou a necesidade de promover un Sínodo diocesano na Diócese de Ourense, celebrado entre os anos 2016 e 2021. Este foi un acontecemento de graza e de comuñón que se debe á doutrina emanada polo Santo Padre ao redor da sinodalidade na Igrexa”.
O bispo de Ourense prosegue sinando que, “aínda que non é hoxe o momento para iso e fáltanos a perspectiva necesaria para emitir un xuízo obxectivo sobre o seu Pontificado, o Papa Francisco era para moita xente, crentes e non crentes, a voz da conciencia da humanidade que clamaba sempre pola paz e a concordia, pola defensa dos migrantes e as persoas vulnerables, buscando sempre o entendemento e a construción de pontes en lugar de muros. O Señor, na súa Divina Misericordia, chamoulle á eternidade precisamente no primeiro día da Oitava de Pascua; encontro neste feito un signo do amor providencial de Dios cara ao Papa Francisco”.
Nese senso, monseñor Leonardo Lemos prega “a todos os fieis que, como peregrinos da fe, viven nesta Igrexa en Ourense, que teñan presente nas súas oracións ao Santo Padre. Tan pronto como nos sexa posible comunicarase o día e a hora en que celebraremos unha misa funeral polo papa Francisco na Catedral de San Martiño de Ourense”.