A música e a maxia son as dúas grandes paixóns de Nacho Samena. Natural de Lugo, este artista polifacético leva o piano practicamente no sangue, tocando dende ben pequeno e percorrendo diferentes escenarios con máis dun grupo. A maxia chegaría á súa vida un pouco máis tarde, tampouco moito. “Ao primeiro tíñalle medo ata que coñecín a un par de magos que me cambiaron o concepto e comecei cos xogos que había por casa (Magia Borrás,…) ata chegar a obsesionarme, empapándome de todo o que me rodeaba”, conta Nacho que deu o seu primeiro espectáculo con 8 anos en Viveiro e xa non parou ata que, lonxe de escoller e decantarse por unha das súas grandes afeccións, logrou combinalas.
Así nace o seu novo espectáculo Suxestión co que, tralo paso por Got Talent onde causou un gran impacto cunha versión máis reducida, chegará ao Barco de Valdeorras. “A estrea será o 20 de marzo en Ribadeo e ao día seguinte estarei no Teatro Lauro Olmo, un espazo moi axeitado para a maxia, íntimo para poder vivir ese imposible máis de cerca, xerando un ambiente único”, explica Samena, que pisaba o teatro barquense por primeira vez o ano pasado no espectáculo do mago Marcos Valdemar e quedou encantando.
Suxestión é unha experiencia única presentada por un dos referentes actuais da maxia onde maxia, comedia e música entrelázanse, para levar ao público a unha viaxe polos seus inicios como pianista e mago, dous camiños que sempre conviviron en constante tensión. A través de números de maxia, humor e pezas ao piano, Nacho constrúe un espectáculo familiar, fresco e sorprendente. “Ten algo para todo o mundo. Hai maxia máis infantil para os pequenos, números no que os adultos verán un trasfondo especial; hai números nos que riran, noutros emocionaranse,…”
A cita será este sábado 21 de marzo ás 20:30 horas e as entradas poden mercarse en Entradium.com