Continúan as actividades formativas incluídas na actividade asistencial comunitaria do Centro de Saúde do Barco, desta volta cunha proposta dirixida aos máis pequenos. Así o salón de actos do CEIP Otero Pedrayo de Viloira acollía na mañá deste venres 6 de outubro o obradoiro infantil “Garavanciño come saniño”, impartido pola nutricionista de referencia para Valdeorras, Natalia Sordo, que estaba acompañada por unha das enfermeiras de Pediatría do Centro de Saúde barquense.
Nesta actividade divulgativa, que a través do xogo se achega aos cativos, busca educar en saúde aos más pequenos, con sinxelos consellos nutricionais e de hábitos alimenticios. Participaban nenos e nenas de 1º e 2º de infantil do CEIP Ramón Otero Pedrayo. En total eran 26 cativos participantes e, para facilitar o traballo práctico, organizábanse dous talleres, o primeiro deles ás 10h.
Fotos cedidas polo CEIP Otero Pedrayo.