As pistas de atletismo Luis Nogueira, no estadio de Calabagueiros do Barco de Valdeorras acollerán o 24 de outubro unha nova proba autonómica: o XIII Campionato Xunta de Galicia de Clubs Sub10 e Sub12. A competición reunirá a trinta e sete equipos femininos e masculinos Sub10 e Sub12 de diferentes clubs galegos, nunha xornada que servirá para poñer en valor a importancia do atletismo de base, peza fundamental do futuro do noso deporte, tal e como destaca a Federación Galega de Atletimo.
Desde as 16:30 ata as 20:00 estarán tomando preto de 400 atletas en representación dos clubs ADAS CUPA, Atletismo Deza, Atletismo Piringalla, Alancar Atletismo, Lucus Caixa Rural Galega, Sanysec-Ourense, At. Femenino Celta, Atlética Lucense, Atletismo Obradoiro, C.A Millaraio, C.D La Purísima, Atletismo Narón, Ferrol Atletismo, Olympo As Pontes, Gimnástica Pontevedra e Vila de Vigo.
Valores e aprendizaxes, os grandes premios
O verdadeiro obxectivo deste campionato estará “nas aprendizaxes adquiridas e nos valores que se transmitan a través do mesmo. O esforzo, o compromiso co equipo, o respecto polos compañeiros e polos rivais e, sobre todo, a deportividade serán os grandes protagonistas dunha xornada na que competir tamén significa aprender, compartir e medrar”, resalta a federación.
A cita representa, ademais, “unha oportunidade para seguir fomentando a práctica deportiva entre os máis novos e reforzar o traballo de clubs, e adestradores quenes xunto ás familias, contitúen os grandes piares do noso deporte”, conclúe a FGA.