A Rede Galega de Teatros e Auditorios, circuíto de exhibición de espectáculos cofinanciado entre a Xunta e 43 entidades locais asociadas, ofrece ata final de ano 21 actuacións escénicas e musicais na provincia de Ourense. Os municipios que acollen esta programación son O Carballiño, O Barco de Valdeorras, A Rúa e a propia cidade de Ourense, que son os que contan con escenarios adheridos a esta ampla carteleira anual.
No Carballiño, a programación do segundo semestre arranca este sábado, 13 de setembro, ás 20,30 horas na praza Maior co concerto Axúdame a sentir, de Xabier Díaz & Adufeiras de Salitre. As outras tres citas na localidade serán xa en decembro no Auditorio Municipal Manuel María cos espectáculos dirixidos a público familiar Os tres porquiños, de EducaTeatro Producións (día 6) e Bichitos de Spasmo Teatro (día 8), así como a actuación Retranca e maxia de Luis Boyano (día 14).
Actuacións en Valdeorras
O seguinte escenario da provincia que retoma a actividade da Rede Galega de Teatros e Auditorios é o Teatro Lauro Olmo no Barco de Valdeorras. Será o vindeiro luns, 15 de setembro, co espectáculo familiar Bulebule, de Os Náufragos. As funcións continuarán en outubro coa obra Abra da cabra, de LÎLÂ TEATRO, (venres 17) e Acender a noite, de Sole Felloza, (venres 31) e xa en novembro coa montaxe As gardiás, de Teatro de Ningures (venres 7), e o concerto de Ecos de Breogán (venres 14).
Pola súa banda, A Rúa programa catro actuacións no Centro Cultural Avenida. A primeira delas será 28 de setembro coa comedia Esas cousas marabillosas, de Empatía Teatro. O día 1 de novembro chegará o espectáculo familiar Quen dixo medo!, de Barafunda, cunha terrorífica sesión de sorrisos para bailar con monstros e, xa en decembro, será a quenda do concerto de Pablo Lesuit (día 5) e as satíricas historias da peza O que hai que ver, de Fulano, Mengano e Citano (día 8).
Continúa a programación no Teatro Principal
Trala estrea de A metamorfose, a nova produción de Sarabela Teatro con subvención á creación por parte da Xunta, a programación do Teatro Principal de Ourense continuou a pasada noite co espectáculo de danza Dique, de Nova Galega de Danza en coprodución co Centro Coreográfico Galego. Neste mes, o día 19, tamén ofrece Los yugoslavos, con texto e dirección de Juan Mayorga e un elenco de luxo formado por Luis Bermejo, Javier Gutiérrez, Natalia Hernández e Alba Planas.
O sábado 15 de novembro o público ourensán poderá gozar así mesmo da estrea de Nas nubes, a nova montaxe de Redrum Teatro, unha comedia distópica sobre o impacto da tecnoloxía nas nosas vidas a partir da obra coa que José Luis Baños de Cos gañou o premio Barriga Verde de textos para monicreques convocado pola Xunta. A programación nese mes complétase coa peza de danza Tabú, de Colectivo Glovo (venres 21) e a nova montaxe de Contraproducións Yo solo quiero irme a Francia (sábado 22). Xa o 4 de decembro, o escenario da rúa da Paz acolle Esas cousas marabillosas, de Empatía Teatro.
Concertos e funcións escénicas en 560 citas culturais
Durante todo este 2025, a Rede Galega de Teatros e Auditorios conta cun orzamento de máis de 2M € e programa 560 funcións de artes escénicas e musicais de 198 formacións en 43 concellos das catro provincias galegas. A Consellería de Cultura, Lingua e Xuventude, a través da Axencia Galega das Industrias Culturais, dispón para este ano dun orzamento de preto de 1 M€ destinado integramente á contratación de formacións artísticas profesionais de teatro, música, danza, circo e maxia, galegas na súa meirande parte, co que se constitúe un mercado determinante para a distribución interior dos espectáculos producidos no país.