Na recta final da tempada o CD Barco roza coa punta dos dedos os postos de promoción, de aí que queira celebralo, unha vez máis coa afección que sempre o apoiou. Así, a directiva decidía decretar “Día do Socio” o partido deste domingo 3 de maio ás 18 horas ante a UD Somozas, ofrecendo dúas entradas de balde por cada abono.
O club pretende así “devolver todo o apoio demostrado ao longo do ano”, no que probablemente sexa o encontro máis importante do ano posto que o play off está a tan só un partido. “Tratase de crear un ambiente único e máxico no último partido de liga”, di o presidente, Nilo Ramos, asegurando que o obxectivo principal está cumprido con creces dende hai semanas. “Todo o que poida chegar a maiores é para nós un premio a unha tempada sublime no retorno á categoría”, di.